Lögreglan á Suðurlandi fékk í gær tilkynningu um að skemmdir hefðu verið unnar á ljósleiðarastreng í grennd við Þykkvabæ. Um er að ræða nýlagða fjarskiptalögn Ljósleiðarans ehf. sem til stóð að taka í notkun á næstunni.

Málið er í rannsókn hjá rannsóknardeild lögreglunnar á Suðurlandi og óskar lögregla eftir því að þeir eða þau sem kunna að búa yfir upplýsingum um málið setji sig í samband við lögregluna á Suðurlandi í gegnum netfangið sudurland@logreglan.is eða í síma 444 2000.

The post Slit á ljósleiðara – málið er í rannsókn appeared first on Fréttatíminn.

„Fötluðu fólki hefur ekki verið auðveldað að taka þátt í orkuskiptum. Bifreiðakaupastyrkir Tryggingastofnunar hafa varla hækkað frá árinu 2009“

Umsögn ÖBÍ réttindasamtaka um drög að hvítbók um samgöngumál

Íslenskt samfélag hefur ekki verið byggt með þeim hætti að allir geti sem best notið. Fatlað fólk hefur setið á hakanum varðandi aðgengi sem hamlar því að það geti lifað sjálfstæðu lífi.

Til stendur að lögfesta samning Sameinuðu þjóðanna um réttindi fatlaðs fólks, SRFF, en í honum eru skuldbindingar á hendur íslenskra stjórnvalda að „bera kennsl á og útrýma hindrunum og tálmunum aðgengis, skulu meðal annars ná til bygginga, vega, samgangna og annarrar aðstöðu innan dyra sem utan,“ skv. 9. gr. og „gera árangursríkar ráðstafanir til þess að tryggja að fatlað fólk geti farið allra sinna ferða og tryggja sjálfstæði þess í þeim efnum, eftir því sem frekast er unnt, meðal annars með því að greiða fyrir því að fatlað fólk geti farið allra sinna ferða með þeim hætti og á þeim tíma sem það kýs og á viðráðanlegu verði“ skv. 20. gr.

ÖBÍ réttindasamtök fagna því að í hvítbók um samgöngumál sé borið kennsl á og gerðar ráðstafanir til að fjarlægja aðgengishindranir fatlaðs fólks í samgöngum.

Góðir innviðir, þ.á.m. samgöngur, rjúfa einangrun og stuðla að betra og sjálfstæðara lífi fatlaðs fólks. Þeir gera því frekar kleift að stunda atvinnu og nám, iðka tómstundir og líkamsrækt og umgangast vini og fjölskyldu, en ekki síður minnka þeir þjónustuþörf þess og eru hagkvæmir öllu samfélaginu.

Algild hönnun er skilvirk hönnun og þegar samgönguáætlanir munu fyrst taka mið af þörfum fatlaðs fólks í umferðinni þá verður afraksturinn betri fyrir alla. Hagkvæmar samgöngur eru þær sem nýtast öllum sem best. Því er undarlegt að það teljist ekki til lykilviðfangsefna í áætluninni að mæta þeim.

Þegar kemur að viðhaldi í samgönguinnviðum eru stjórnvöld hvött til að þess sé gætt að nýta tækifærið og byggja upp og bæta aðgengi fyrir fatlað fólk. Vegagerðin hefur gefið út afar góðar leiðbeiningar sem rétt væri að fara eftir við allar framkvæmdir utandyra um allt land.[1]

Bent er á að íslensk löggjöf skyldar aðila til að gera samgöngumannvirki aðgengileg fyrir alla við uppbyggingu eða endurbætur, að þjálfa starfsfólk í þjónustu við fatlaða, að gera allar upplýsingar aðgengilegar og upplýsandi um aðgengi og síðast en ekki síst að taka aðeins í notkun almenningssamgöngutæki, hvort sem eru almenningsvagnar, flugvélar eða bátar, sem eru aðgengileg fötluðu fólki jafnt sem ófötluðu. Því hefur ekki verið vel framfylgt.

Það er mikilvægt að efla og auka vægi almenningssamgangna um land allt. Það styrkir byggðir landsins, er umhverfisvænt og gefur fólki aukið val um að nýta aðra samgöngumáta en einkabílinn. Strætisvagnar eru að mestu leyti óaðgengilegir hreyfihömluðu fólki, sérstaklega landsbyggðastrætó og biðstöðvar eru í lamasessi eins og sjá má í úttekt sem ÖBÍ lét framkvæma.[2]

Flugrútan er heldur ekki aðgengileg hreyfihömluðu fólki og getur kostnaður þess til ferðalaga því verið talsvert hærri en annarra og varla hægt að segja að Keflavíkurflugvöllur mæti þörfum millilanda- og tengiflugs fyrir fatlaða flugfarþega. Því er ánægjulegt að sjá að til standi að móta uppbyggingaráætlun til að takast á við þennan vanda, sbr. aðgerð 4.1.2, sem vonandi tekst að fjármagna.

Vegna þessa hefur fatlað fólk enn lítið svigrúm til að taka þátt í uppbyggingu umhverfislega sjálfbærra samgangna en rétt er að benda á að margt fatlað fólk er og verður háð einkabílnum um að komast milli staða. Því verður að gæta betur að því að þrengingar og fækkun bílastæða í nafni sjálfbærni og lýðheilsu verði ekki til að fjölga hindrunum.

Fötluðu fólki hefur ekki verið auðveldað að taka þátt í orkuskiptum. Bifreiðakaupastyrkir Tryggingastofnunar hafa varla hækkað [3] frá árinu 2009 og því neyðast margir til að keyra áfram á gömlum skrjóðum með síauknum viðhalds- og eldsneytiskostnaði. Einnig eru hleðslustöðvar fyrir rafbíla mjög víða óaðgengilegar fötluðu fólki því engar reglur hafa verið settar um staðsetningu þeirra.

Aðgengishópur ÖBÍ sá sig tilneyddan til að senda ábendingar [4] til helstu uppsetningaraðila vorið 2022 í von um að það myndi auka vitund þeirra og framkvæmdagleði. Því er gleðilegt að nú eigi að móta hönnunarleiðbeiningar vegna hleðslustöðva, sbr. aðgerð 4.1.3, en tímaramminn er ansi rúmur. Það er hægt að útbúa góðar leiðbeiningar á skömmum tíma og er mikilvægt því uppbygging hleðslustöðva fyrir rafbíla er gríðarlega ör.

Að gefnu tilefni er ítrekað að stjórnvöldum er skylt að hafa virkt samráð við heildarsamtök fatlaðs fólks um ákvarðanir sem varða hagsmuni þess, samkvæmt ákvæðum samnings Sameinuðu þjóðanna um réttindi fatlaðs fólks (SRFF), enda segir í 3. mgr. 4. gr., „aðildarríkin skulu, þegar þau undirbúa og beita löggjöf sinni og stefnu samningi þessum til framkvæmda og vinna að ákvarðanatöku um málefni fatlaðs fólks, hafa náið samráð og tryggja virka þátttöku fatlaðs fólks, þ.m.t. fötluð börn, með milligöngu samtaka sem koma fram fyrir þess hönd“.

Ekkert um okkur án okkar.

Með vinsemd og virðingu,

Þuríður Harpa Sigurðardóttir
formaður ÖBÍ

Stefán Vilbergsson
verkefnastjóri ÖBÍ

Heimildir & tilvísanir

1 Reykjavíkurborg og Vegagerðin. (2019). Hönnun fyrir alla: Algild hönnun utandyra [Leiðbeiningar PDF]
2 ÖBÍ réttindasamtök. (2022, 17. nóvember). „Slæmt aðgengi að nærri öllum biðstöðvum strætisvagna á landsvísu“ [Frétt]
3 Fjárhæðir hækkuðu fyrst með reglugerð nr. 997/2015 þrátt fyrir að verðlag hafði hækkað umtalsvert á 6 ára tímabili. Aftur voru fjárhæðir hækkaðar árið 2021, en í þetta sinn aðeins á sérútbúnum og dýrum bifreiðum, með reglugerð nr. 905/2021.
4 Sjá fylgiskjal með umsögninni.

Drög að hvítbók um samgöngumál og umhverfismatsskýrsla. Mál nr. 66/2023. Innviðaráðuneytið.
Umsögn ÖBÍ, 21. apríl 2023[/vc_column_text][/vc_column][/vc_row]

The post Drög að hvítbók um samgöngumál appeared first on Fréttatíminn.

BSRB, stærstu heildarsamtök launafólks í opinberri þjónustu á Íslandi, leggur áherslu á að ríkið verði að auka við tekjuöflun sína til að unnt sé að efla velferðarþjónustu og styðja betur við barnafólk og tekjulægri hópa, í umsögn sinni um fjármálaáætlun ríkisstjórnarinnar 2024-2028.

“Beðið var eftir þessari fjármálaáætlun með nokkurri eftirvæntingu þar sem fólk er farið að finna verulega fyrir verðbólgunni og vaxtahækkunum á eigin skinni. Það voru því vonbrigði fyrir okkur hjá BSRB að sjá að þessi fjármálaáætlun er hvorki til þess fallin að draga úr verð´bólgunni sem bítur okkur öll, né heldur til að auka velferð og jöfnuð í landinu. Nú er tíminn til að afla tekna hjá þeim sem sannarlega hafa svigrúm til þess að leggja meira til samneyslunnar t.d. sjávarútvegi, stórfyrirtækjum og stóreignafólki.”  segir Heiður Margrét Björnsdóttir, hagfræðingur BSRB.

BSRB leggur áherslu á að:

• Almannaþjónustan verði efld til að auka velsæld og bæta kjör og starfsumhverfi þeirra sem veita þjónustuna.
• Tekjuöflun verði aukin hjá þeim sem sannarlega hafa svigrúm til þess að greiða hærri skatta. Með því megi tryggja rekstur opinberrar þjónustu og tryggja sjálfbærni ríkissjóðs. Í þessu samhengi mætti til dæmis nefna hátekjuskatt, eignaskatta, bankaskatt, hækkun fjármagnstekjuskatts og hærri hlutdeild almennings af tekjum fyrir afnot af sameiginlegum auðlindum þjóðarinnar. Það ýtir undir velsæld og jöfnuð og mun skila sér í þróttmeira hagkerfi til lengri tíma.
• Ríkissjóður styðji við fólk í tekjulægri hópum og heimili með þunga framfærslubyrði með eflingu barna-, húsnæðis- og vaxtabótakerfisins.
• Stofnframlög verði aukin til að tryggja 1.000 almennar íbúðir árlega og húsnæðis- og vaxtabótakerfin efld svo að byrði húsnæðiskostnaðar tekjulægri hópa verði ekki umfram 25 prósent af ráðstöfunartekjum.
• Hækka þarf lágmarks- og hámarksgreiðslur í fæðingarorlofskerfinu og brúa umönnunarbilið frá fæðingarorlofi til leikskóla.
• BSRB leggur ríka áherslu á að allar breytingar á starfsumhverfi starfsfólks ríkisins verði að höfðu samráði við samtök launafólks.

Lesa má umsögnina í heild sinni hér.

The post Ríkið afli tekna og auki velferð appeared first on Fréttatíminn.

Héraðsdómur Reykjavíkur hefur dæmt Magnús Aron Magnússon, 21 árs karlmann, í sextán ára fangelsi fyrir að myrða Gylfa Bergmann Heimisson, nágranna sinn, með hrottafengnum hætti í Barðavogi í Reykjavík síðasta sumar. Vísir greindi fyrst frá.

Þá var hann dæmdur til að greiða aðstandendum 31,5 milljónir króna í bætur. Geðlæknar voru sammála um að Magnús hefði þurft geðræna aðstoð fyrir löngu síðan. Faðir hans hafi komið í veg fyrir að hann fengi einhverfugreiningu og hann hafi alist upp við ofbeldi og vanrækslu. Hann var þó talinn sakhæfur.

The post 21 árs dæmdur í sextán ára fangelsi fyrir morð appeared first on Fréttatíminn.

Brot 120 ökumanna voru mynduð á Breiðholtsbraut í Reykjavík frá mánudeginum 24. apríl til fimmtudagsins 27. apríl. Fylgst var með ökutækjum sem var ekið Breiðholtsbraut í vesturátt, á gatnamótum við Stekkjarbakka.

Á rúmlega þremur sólarhringum fóru 26.433 ökutæki þessa akstursleið og því óku hlutfallslega mjög fáir ökumenn of hratt eða yfir afskiptahraða. Meðalhraði hinna brotlegu var 78 km/klst en þarna er 60 km hámarkshraði. Sá sem hraðast ók mældist á 87. Sex ökutækjum var ekið gegn rauðu ljósi á umræddu tímabili.

Brot 36 ökumanna voru mynduð á Suðurlandsbraut í Reykjavík í dag. Fylgst var með ökutækjum sem var ekið Suðurlandsbraut í vesturátt, á móts við Suðurlandsbraut 24. Á einni klukkustund, fyrir hádegi, fóru 487 ökutæki þessa akstursleið og því óku allnokkrir ökumenn, eða 7%, of hratt eða yfir afskiptahraða. Meðalhraði hinna brotlegu var 75 km/klst en þarna er 60 km hámarkshraði. Sá sem hraðast ók mældist á 87.

Brot 68 ökumanna voru mynduð á Vesturlandsvegi í Reykjavík í gær. Fylgst var með ökutækjum sem var ekið Vesturlandsveg í vesturátt, að Höfðabakka. Á einni klukkustund, eftir hádegi, fóru 1.200 ökutæki þessa akstursleið og því óku allnokkrir ökumenn, eða 6%, of hratt eða yfir afskiptahraða. Meðalhraði hinna brotlegu var 93 km/klst en þarna er 80 km hámarkshraði. Sex óku á 100 km hraða eða meira en sá sem hraðast ók mældist á 109.

Vöktun lögreglunnar er liður í umferðareftirliti hennar á höfuðborgarsvæðinu, en þess má geta að skýjað og blautt var á meðan hraðamælingunni stóð.

The post Brot 224 ökumanna mynduð appeared first on Fréttatíminn.

Átján ára piltur var í dag í Héraðsdómi Reykjaness úrskurðaður í áframhaldandi gæsluvarðhald til 24. maí á grundvelli almannahagsmuna að kröfu lögreglunnar á höfuðborgarsvæðinu í þágu rannsóknar hennar á andláti karlmanns á þrítugsaldri í Hafnarfirði í síðustu viku.

Tveimur öðrum piltum, sem báðir eru yngri en 18 ára, var enn fremur gert að sæta vistun á vegum barnaverndaryfirvalda í tengslum við málið, sömuleiðis til 24. maí. Síðarnefndu piltarnir hafa báðir kært úrskurðinn til Landsréttar. Allir þrír hafa sætt gæsluvarðhaldi frá því að málið í Hafnarfirði kom upp.

Ekki er hægt að veita frekari upplýsingar um rannsókn málsins að svo stöddu.

The post Átján ára piltur í gæsluvarðhaldi til 24. maí vegna andláts manns appeared first on Fréttatíminn.

Tveir aðilar eru í haldi lögreglunnar í tengslum við andlát á Selfossi síðdegis í dag. Grunur leikur á að um saknæmt athæfi sé að ræða. Tveir karlmenn voru síðdegis í dag handteknir eftir að manneskja fannst látin á Selfossi.

Til rannsóknar er hvort andlátið hafi borið að með saknæmum hætti en lögreglan á Suðurlandi vill ekki tjá sig um málið að svo stöddu og segir að málið sé á frumstigi rannsóknar.

The post Tveir handteknir vegna andláts á Selfossi appeared first on Fréttatíminn.

The post Greingartól á foreldraútilokun appeared first on Fréttatíminn.

Hugleiðingar veðurfræðings

Það verður norðlæg átt í dag, víða 3-10 m/s. Skýjað og dálítil snjókoma suðvestanlands en léttir til eftir hádegi. Stöku él norðaustantil en annars bjart að mestu. Hiti 0 til 6 stig að deginum svalast norðaustantil og á Vestfjörðum.

Hvessir aðeins í nótt, norðlæg átt 5-13 m/s á morgun, en 10-15 m/s austast á landinu. Bjart veður um allt land en líkur á smáskúrum á Suðausturlandi eftir hádegi. Hiti breytist lítið.

Svipað veður verður á sunnudag en þykknar upp norðaustanlands eftir hádegi með dálitlum éljum um kvöldið. Hiti 2 til 6 stig en nálægt frostmarki á norðanverðu landinu. Spá gerð: 28.04.2023 06:07. Gildir til: 29.04.2023 00:00.

Veðurhorfur á landinu

Norðlæg eða austlæg átt, víða á bilinu 5-10 m/s. Dálítil snjókoma á Suðvesturlandi, en léttir til þar eftir hádegi. Lítilsháttar él á norðaustanverðu landinu, en þurrt og bjart norðvestantil. Hiti 0 til 4 stig yfir daginn og víða næturfrost.
Norðlæg átt 3-10 á morgun en 10-15 austast. Yfirleitt bjart en sums staðar skýjað og smáskúrir suðaustantil. Hiti 0 til 8 stig að deginum, hlýjast suðvestanlands.
Spá gerð: 28.04.2023 05:12. Gildir til: 29.04.2023 00:00.

Veðurhorfur á landinu næstu daga
Á laugardag:
Norðlæg átt 5-13 m/s og bjartviðri, en austlægari sunnanlands, skýjað og dálítil væta. Frost 0 til 5 stig, en hiti rétt yfir frostmarki að deginum sunnantil.

Á sunnudag:
Norðlæg átt, víða 8-13 og bjartviðri, en þykknar upp með dálítilli snjókomu á norðanverðu landinu um kvöldið. Hiti breytist lítið.

Á mánudag:
Norðlæg átt 3-10 en 8-13 austast. Lítilsháttar él á Norður- og Austurlandi og vægt frost, en þurrt sunnan heiða með hita að 5 stigum yfir daginn.

Á þriðjudag:
Fremur hæg breytileg átt og yfirleitt bjart en sums staðar skýjað við suður- og austurströndina. Hiti 2 til 7 stig en um frostmark norðaustanlands.

Á miðvikudag:
Hæg breytileg átt og skýjað að mestu en bjart norðaustantil. Suðaustanátt með dálítilli rigningu suðvestast á landinu um kvöldið. Hiti 0 til 6 stig, svalast á Austfjörðum.

Á fimmtudag:
Útlit fyrir suðaustanátt með rigningu um vestanvert landið en hægari og þurrt fyrir austan. Hiti 3 til 8 stig. Spá gerð: 27.04.2023 20:42. Gildir til: 04.05.2023 12:00.

The post Skýjað og dálítil snjókoma suðvestanlands appeared first on Fréttatíminn.

Vegna rannsóknar á andláti konu á þrítugsaldri sem fannst látin í heimahúsi á Selfossi síðdegis í gær hefur lögreglan á Suðurlandi gert kröfu fyrir Héraðsdómi Suðurlands um að tveir karlmenn sem handteknir voru á vettvangi í gær verði úrskurðaðir í gæsluvarðhald í eina viku.

Mennirnir eru báðir á þrítugsaldri. Grunur er um að andlát konunnar hafi borið að með saknæmum hætti. Rannsókn málsins er á viðkvæmu stigi. Vegna rannsóknarhagsmuna getur lögregla ekki veitt frekari upplýsingar um málið.

The post Vegna rannsóknar á andláti konu á þrítugsaldri appeared first on Fréttatíminn.