Ásgarðslaug opnar á ný eftir endurbætur í dag, sumardaginn fyrsta
Endurbætur á sundlauginni í Ásgarði og rýmum innandyra er ein stærsta framkvæmdin sem hefur verið í gangi hjá Garðabæ á þessu og síðasta ári. Íbúum er þökkuð sú biðlund sem þeir hafa sýnt á meðan laugin var lokuð.
Miklar endurbætur
Öll yfirborðsefni á á baðklefum og sundlaug hafa verið endurnýjuð. Nýir heitir pottar hafa verið byggðir með nuddstútum undir yfirborðinu, nýr kaldavatnspottur var byggður sem og vað- og setlaug með barnarennibraut. Gufubaðið hefur verið endurnýjað og nýjar útisturtur settar upp fyrir utan.
Útiklefar hafa verið endurnýjaðir og í inniklefum karla og kvenna eru nýjir klefar fyrir fatlað fólk. Allar sturtur hafa verið endurnýjaðar. Ný girðing kemur utan um allt sundlaugarsvæðið og í nýju vaktherbergi verður fullkomið eftirlits- og myndavélakerfi sem eykur mjög öryggi sundlaugargesta.
Innandyra var gólf í danssal lagað og rými opnað við hlið salarins þar sem þrekaðstaða almennings flyst upp úr kjallara. Kjallari var jafnframt stækkaður til að koma hreinsibúnaði fyrir.
Sundlaugin opnar kl. 10 í dag, sumardaginn fyrsta
Klukkan 10 í dag, opnar Ásgarðslaug á ný fyrir almenning við hátíðlega athöfn. Boðið verður upp á tónlistaratriði innandyra og hressingu við sundlaugarbakkann. Ókeypis aðgangur verður í laugina þennan dag og út helgina til og með 22. apríl. Verið velkomin í sund!
The post Ásgarðslaug í Garðabæ opnar á ný í dag, sumardaginn fyrsta appeared first on Fréttatíminn.is.