Kosið um hvort setja eigi orkupakkann í þjóðaratkvæðagreiðslu á vef Pírata

Píratar hafa það lýðræðislega fyrirkomulag í vinnubrögðum sínum, að mál eru sett á vef þeirra, þar sem að málefni fá bæði efnislega umfjöllun og svo opna kosningu. Niðurstaða í þessu máli ætti að verða ljós fljótlega. Fjallað er m.a.um málið á Pírataspjallinu

Álykta Píratar að:

• Setja skuli í þjóðaratkvæðagreiðslu öll lög er tengjast innleiðingu á orkumálastefnu Evrópubandalagsins og þingmönnum beri að fylgja þeirri afstöðu sem þjóðin tekur í slíkri kosningu.
• Þriðji orkupakkinn skv. þingskjali 1237-777, skuli lagður í dóm þjóðarinnar í þjóðaratkvæðagreiðslu í kjölfar áreiðanlegrar upplýsingagjafar skv. upplýsingaskyldu stjórnvalda, þar sem:
  i) staðreyndir og álitamál eru reifuð með hlutlausum hætti og
  ii) allar lagabreytingar sem þarf til innleiðingar orkupakkans skýrðar.
  Þingmönnum beri að fylgja þeirri afstöðu sem þjóðin tekur í þjóðaratkvæðagreiðslu um þriðja orkupakkann.

Greinargerð

Þriðji orkupakkinn hefur verið til umræðu á Alþingi Íslendinga síðan 1. apríl 2019. Gerðar hafa verið ítrekaðar skoðanakannanir á þessu tímabili um vilja þjóðarinnar í málinu sem hafa gefið til kynna að meirihluti þeirra sem taka afstöðu eru á móti því að samþykkja orkupakkann. Á sama tíma er ljóst að gögn og upplýsingar í almennri umræðu eru nokkuð misvísandi og tilfinningarík. Þar sem þingheimur hefur lýst því yfir að hann ætli sér að kjósa með orkupakkanum er ómögulegt annað en að senda þetta umdeilda mál í þjóðaratkvæðagreiðslu sem þingi ber í kjölfarið að fylgja.

Málið varðar orkuauðlindir þjóðarinnar og þjóðin hafi óskoraðan rétt til að sýsla um eigin auðlindir. Í ljósi þess að ný stjórnarskrá með sterku auðlindaákvæði hefur ekki tekið gildi, þrátt fyrir skýran vilja þjóðarinnar þar um, sbr. niðurstöðu þjóðaratkvæðagreiðslu frá 2012, þá er eðlilegt að þjóðin fái síðasta orðið.
Píratar hafa ekki samþykkta stefnu í málinu sem kjörnir fulltrúar geta stuðst við. Krafa um þjóðaratkvæðagreiðslu um orkumálastefnu Evrópu er í fullu samræmi við grunnstefnu Pírata og rúmar ólíkar skoðanir félagsfólks á málinu sjálfu.