,,Engin raunveruleg samkeppni á milli félaganna og hefur aldrei verið”

Bílatryggingar eru 50-100% dýrari hér á landi en á hinum Norðurlöndunum samkvæmt samanburði sem FÍB gerði í október. Ítarlega er fjallað um þessa iðgjaldakönnun í nýútkomnu blaði FÍB. Engar eðlilegar skýringar eru á því hvers vegna munurinn er svona mikill íslenskum bíleigendum í óhag.

Í Danmörku eru bílar til dæmis dýrari en hér og laun svipuð. Samt eru íslensku bílatryggingarnar 57-97% dýrari en þær dönsku. Danskt tryggingafélag innheimtir rúmlega 97 þúsund króna iðgjald á móti 153 til 192 þúsund króna iðgjaldi íslensku félaganna. Fíb hefur rannsakað málið í þaula og hefur komist að niðurstöðu:

Einu „eðlilegu“ skýringarnar á þessum mikla verðmun liggja í því að íslensku tryggingafélögin okra á bíleigendum vegna þess að þau komast upp með það. Engin raunveruleg samkeppni ríkir á milli félaganna og hefur aldrei gert. Fjármálaeftirlit Seðlabankans beinlínis hvetur félögin til að hafa sem hæst iðgjöld. Þessum ofteknu iðgjöldum er safnað í tugmilljarða króna sjóði sem tryggingafélögin ávaxta í þágu eigenda sinna.

Í könnun FÍB voru tekin hliðstæð dæmi um bíltegundir og fjölskylduaðstæður, til að fá sem réttastan samanburð. Óskað var eftir iðgjaldatilboðum í VW Golf annars vegar og Toyota RAV hins vegar. Hér má sjá töflu yfir iðgjöldin sem tryggingafélög á Norðurlöndunum buðu í Golfinn.

Næstu daga verður nánar fjallað hér á vefsíðu FÍB um iðgjaldasamanburðinn.

Nánar er hægt að lesa um málið í FÍB Blaðinu

Háar arðgreiðslur til hluthafa tryggingafélaga á sama tíma og iðgjöld á almenning hækka