Eftir að hafa lengi dreymt um að ná til bragðlauka Frakka með uppskriftum sínum eru hjónin Inga Elsa Bergþórsdóttir og Gísli Egill Hrafnsson að setja Ísland á kortið sem paradís matgæðinganna. Velgengni nýjustu bókar þeirra, La Cuisine Scandinave, er farin að draga erlenda ferðamenn til landsins, nánar tiltekið á Blönduós.
Eftir að hjónin Inga Elsa Bergþórsdóttir og Gísli Egill Hrafnsson fluttu heim úr námi í Frakklandi hafa þau fyrst og fremst starfað við leiðsögn Frakka um landið, auk þess að starfa við grafíska hönnun og ljósmyndun. Inga Elsa er alin upp í sveit og á ættir sínar að rekja til Blönduóss þar sem þau Gísli keyptu sér gamalt bílaverkstæði stuttu eftir heimkomuna. Þar hafa þau eytt sumrum og frítíma sínum og nostrað við sína helstu ástríðu; að lifa af landinu í takt við náttúruna. Afrakstur ástríðunnar er að finna í matreiðslubókum þeirra, Góður matur–gott líf, Eldað og bakað í ofninum heima og Sveitasæla. Bækurnar, sem hafa verið tilnefndar til Íslensku bókmenntaverðlaunanna og Hagþenkis, eru alfarið unnar af þeim sjálfum og er sveitin þeirra, heimilið og fjölskyldan alltaf í forgrunni. Nú hefur franski útgáfurisinn Hatchette gefið út þeirra nýjustu bók, La Cuisine Scandinave, og skemmst er frá því að segja að hún hefur slegið í gegn. Bókin situr á metsölulistum í Kanada, Sviss og Frakklandi og hefur fengið umfjöllun í öllum helstu dagblöðum Frakklands.
Matarferðamennska óvæntur sproti
„Þetta hefur komið okkur skemmtilega á óvart,“ segir Inga Elsa en þau hjónin hafði lengi dreymt um að ná til bragðlauka Frakka með uppskriftum sínum. Eftir að hafa reynt að sannfæra íslenska útgefendur án árangurs ákváðu þau að prófa að senda nokkrum erlendum forlögum efni. „Við höfðum engu að tapa og þegar Hathcette hafði samband og vildi strax gefa bókina út og auk þess gera við okkur samning til lengri tíma urðum við auðvitað mjög glöð. Þetta kom okkur dálítið á óvart því við erum ekki að kynna klassíska norræna matargerð heldur okkar eigin útfærslu á henni,“ segir Inga Elsa en í La Cuisine Scandinave er áherslan lögð á listina að lifa af landinu, líkt og í þeirra fyrri bókum.
„Bókin er örugglega ágætis landkynning því hvert sem við förum að kynna hana þá erum við kynnt sem Íslendingar. Við höfum ferðast töluvert með hana og fengum eiginlega vægt sjokk að sjá bókina okkar liggja meðal frægra höfunda á borð við Ottoman Lenghi, því við erum ekkert þekktir einstaklingar,“ segir Inga Elsa og bætir því við að fjölmargar erlendar ferðaskrifstofur hafi haft samband með það í huga að búa til matarferðir til Íslands. „Það er óvæntur og skemmtilegur sproti að bókin sé að kortleggja Ísland sem matarland og áfangastað matgæðinga.“
Vilja upplifa landið með matgæðingum
Velgengni bókarinnar kemur sér vel því auk þess að vera landkynning fyrir Ísland þá er hún í raun líka kynning á næsta verkefni þeirra sem hefur verið í pípunum í nokkurn tíma. „Við höfum tekið mikið á móti Frökkum í húsinu okkar á Blönduósi í gegnum tíðina og lengi haft þá hugmynd að taka þar almennilega á móti ferðamönnum og kynna þeim það sem náttúran hefur upp á að bjóða og hvernig okkur finnst best að elda og geyma mat. Þetta verður svona vinnustofu–kennslueldhús þar sem við munum deila okkar upplifun af landinu með gestunum og kenna þeim að njóta náttúrunnar. Við höfum engan áhuga á afþreyingarferðamennsku þar sem fókusinn er á massann, heldur viljum að gestirnir upplifi með okkur náttúruna. Þetta er allt á frekar lágstemmdum nótum og við erum í raun að móta hugmyndirnar en fyrst við erum að fá þessa góðu kynningu í gegnum bókina þá er best að byrja bara að taka á móti fólki,“ segir Inga Elsa. „Allur myndheimur bókanna er líka úr þessu umhverfi þannig að í raun höfum við gert mjög mikla markaðssetningu á svæðinu.“
Heimamenn hlógu að þeim
Framkvæmdagleði þeirra Ingu Elsu og Gísla hefur samt ekki alltaf verið tekið opnum örmum á svæðinu. „Okkur var boðið til kaups þetta gamla bílaverkstæði fyrir tólf árum og höfum hægt og rólega gert það upp og skrifað allar okkar bækur þar. Við hefðum aldrei látið okkur detta í hug að kaupa húsið nema fyrir hvatningu og vilyrði þáverandi bæjaryfirvalda. Á þessum tíma voru bæjarfélög að gefa gömul hús til að gera upp til að styrkja innviði samfélagsins. Nú sjáum við um allt land afrakstur af þeirri vinnu og margir staðir eru að koma mjög sterkir inn sem áhugaverðir staðir sem ferðamenn vilja sækja heim t.a.m. nágrannar okkar á Siglufirði. En síðan hefur mikið vatn runnið til sjávar. Margir skildu okkur ekki og það var jafnvel hlegið að okkur fyrir uppátækið og ekki voru allir á eitt sáttir við framkvæmdagleðina. Þegar við svo fórum að þróa þessar hugmyndir sem nú eru að raungerast fannst okkur það heillandi hugmynd að nýta húsið okkar til góðra verka og snúa til baka í gamla bæjarfélagið til þess að byggja upp fyrirtækið okkar. Í gegnum bækurnar okkar höfum unnið markvisst að því að markaðssetja þetta svæði sem er einstök náttúruparadís og vonumst við að heimamenn njóti afrakstur af þeirri vinnu með okkur á komandi árum.“
Dapurleg þróun í ferðamennsku
Blönduós hefur hingað til ekki verið ómissandi viðkomustaður ferðamanna en Inga Elsa hefur fulla trú á svæðinu. Alltaf sé pláss fyrir fólk sem vilji njóta þess að fá persónulega upplifun af landinu og sveitin í kringum Blönduós hafi upp á allt að bjóða. „Sérstaðan við Ísland er hvað þetta er stórt land sem við eigum og það er ennþá hægt að vera á stöðum sem eru ekki yfir fullir af ferðamönnum. Hluti af upplifuninni þegar þú ferðast er að hitta fólk og vera í samskiptum við heimamenn. Þess vegna finnst mér dálítið dapurleg sú þróun að á stöðum sem ferðamenn sækja í eru fáir Íslendingar að taka á móti þeim. Það er undantekning að ferðamenn hitti fólkið á bak við fyrirtækin. En okkur langar að veita góða og persónulega þjónustu og gefa fólki innsýn í það hvernig við lifum af landinu.“
The post Setja matarmenningu Íslands á heimskortið appeared first on Fréttatíminn.