Breska þingið samþykkti í vikunni að endurnýja á næstu árum Trident eldflaugar landsins og þá kjarnorkukafbáta Bretlands sem vopnin bera. Kjarnavopnin sem nú eru í notkun eru staðsett við Clyde-fjörð skammt frá Glasgow og í 1100 km fjarlægð frá Íslandsströndum. Ummæli nýs forsætisráðherra, Theresu May, um að hún sé tilbúin að ýta á „rauða hnappinn“ gerist þess þörf, vöktu nokkra athygli.
Trident kjarnorkuáætlun Bretlands snýst um fælingarmátt kjarnavopnanna og á rætur í Kalda stríðinu. Vopnin voru ekki hugsuð til árásar heldur sem vörn gegn vopnabúri Sovétríkjanna. Kjarnaárás að utan átti að vera hægt að svara í sömu mynt og í þeim möguleika fólst fælingarmátturinn. Þeir kafbátar í Trident kerfinu sem nú eru í notkun eru smíðaðir á árunum 1986-1994 en þeir munu teljast að fullu úreltir í lok næsta áratugar.
Í atkvæðagreiðslu í breska þinginu sem fram fór um málið í byrjun viku klofnaði breski Verkamannaflokkurinn í afstöðu sinni. Leiðtoginn umdeildi, Jeremy Corbyn, sem hefur lengi barist gegn kjarnavopnum, greiddi atkvæði gegn endurnýjun flotans ásamt 47 öðrum þingmönnum flokksins, en 140 þingmenn flokksins greiddu hins vegar atkvæði með tillögunni.
Þeir sem styðja endurnýjunina telja að ekki sé hægt að segja fyrir um þær ógnir sem munu steðja að Bretlandi í framtíðinni. Á móti benda andstæðingar á að þær ógnir séu alls ekki þær sömu og voru á tímum Kalda stríðsins.
Skoski þjóðarflokkurinn var allur á móti málinu, enda vopnin norður í Skotlandi, og stóðu einnig Frjálslyndir demókratar sameinaðir gegn því. Íhaldsflokkurinn undir leiðsögn Theresu May, hins nýbakaða forsætisráðherra, var nærri sameinaður í stuðningi sínum við endurnýjunina. Svo fór að mikill meirihluti var í þinginu fyrir endurnýjun. 355 fleiri þingmenn voru með henni en á móti.
Ummæli Theresu May um að hún væri, undir réttum kringumstæðum, tilbúin að nota vopnin vöktu mikla athygli í Bretlandi og jafnvel hneykslun. May sagði hins vegar að hugmyndin um fælingarmátt vopnanna væri einmitt sú að „óvinirnir þurfa að vita að við séum tilbúin að nota vopnin.“ Hún ásakaði leiðtoga Verkamannaflokksins og einnig fulltrúa græningja um að vera fremsta í flokki þegar kæmi að því að verja óvini landsins.
Ljóst er að efnahagslegt mikilvægi verkefnisins er mikið. Áætlað er að smíði nýs flota og vopnanna muni kosta 40 milljarða punda, rúmlega 6400 milljarða króna. Einnig er búist við að endurnýjunin muni skapa um 15 þúsund vel launuð og sérhæfð störf í tæknigreinum og verkfræði.
The post Kjarnavopnin í nágrenninu appeared first on Fréttatíminn.