Auglýsing um jörðina Grímstungu í Vatnsdal sem Arion banki seldi til Ingimars Jóhannssonar, þáverandi skrifstofustjóra í landbúnaðarráðuneytinu, finnst ekki samkvæmt svari frá bankanum. Fréttatíminn fjallaði um jarðarkaupin í síðustu viku en Ingimar vann með skuldsettar bújarðir í starfi sínu í ráðuneytinu. Kaupverðið var 85 milljónir og er jörðin veðbandalaus.
Í þeirri umfjöllun kom fram að jörðin hefði verið skráð og seld í gegnum fasteignasala í Borgarnesi. Í vinnureglum um sölu fasteigna hjá Arion banka segir meðal annars: „Þegar fasteignasölur hafa fengið eign til sölu ber þeim að auglýsa eignina á heimasíðu sinni og á útbreiddum fasteignavef.“ Fréttatíminn hefur ekki náð í fasteignasalann í Borgarnesi, Inga Tryggvason, til að spyrja hann um sölu eignarinnar. Ingi hefur í gegnum árin unnið oft fyrir Arion banka við sölu fasteigna.
Vel kann að vera að jörðin hafi verið auglýst til sölu, líkt og reglur bankans gera ráð fyrir, en Arion hefur ekki sýnt fram á það.