Í síðustu viku voru samþykkt afar umdeild lög í breska þinginu sem hafa þann tilgang að koma í veg fyrir að börn rekist á klám á netinu. Breska kvikmyndaeftirlitið BBFC fær með lögunum vald til að þvinga fjarskiptafyrirtæki til að útiloka klámsíður sem ekki hafa stranga aldursgátt. Aldursgáttin skilyrðir neytandann til að upplýsa um aldur sinn áður en hann kemst inn á síðuna.
„Ef síðurnar fara ekki eftir lögum um aldurstakmörk, þá á að útiloka þær,“ segir Karen Bradley, ráðherra menningarmála í Bretlandi.
María Rún Bjarnadóttir, doktorsnemi í lögfræði við Sussex University, bendir á að löggjöfin sé umfangsmikil og hafi 
farið í gegnum þingið án mikillar umræðu. „Þetta hefur verið gagnrýnt vegna þess að afleiðingar hennar þykja ófyrirséðar á mörgum sviðum. Reglan um hlutverk fjarskiptafyrirtæka varðandi aðgang barna að klámi er bara ein af breytingunum sem lögin fela í sér. Hún er viðbragð við rannsóknum sem sýna að börn sjá klám á netinu mjög ung. Sambærilegar rannsóknir eru til frá Íslandi, en engar sambærilegar heimildir hafa verið til umræðu hér á landi. Það hefur verið fjallað um þetta þannig að það sé verið að fela einkaaðilum að framfylgja refsilöggjöf. Nú verður hægt að refsa fjarskiptafyrirtækjum fyrir það sem hingað til hefur verið órjúfanlegur hluti af þeirra starfsemi. Baráttuhópar fyrir tjáningarfrelsi telja þetta sé í raun ritskoðun og verið sé að fela fjarskiptarisum að ritskoða internetið. Lögfræðingar halda því fram að lögin séu raungerning á því að skipta internetinu í landsvæði, og þá blossar upp umræða upp um hvernig eigi að staðsetja vefsíður.“
„Það getur aldrei verið í verkahring fjarskiptafélaga að ritskoða netið. Þótt tilgangur laganna í Bretlandi sé göfugur er ljóst að gagnrýnisraddir eru um framkvæmdina. Við lagasetningu sem þessa er mjög mikilvægt að gæta að persónuvernd og að þau verði ekki íþyngjandi fyrir neytendur eða á ábyrgð fjarskiptafélaga að framfylgja lögunum,“ segir Gunnhildur Arna Gunnarsdóttir, upplýsingafulltrúi Símans.
Guðberg Jónsson, verkefnastjóri SAFT, vakningarátaks um örugga netnotkun barna, segir vert að skoða allar tilraunir til að vernda börn frá óæskilegu efni. „Þetta er mjög spennandi tilraun í Bretlandi. En við getum ekki treyst alfarið á tæknilausnir, það hefur sýnt sig. Ef börn rekast á klám er það á ábyrgð foreldranna og því vinnum við aðallega að fræðslu og forvörnum. Við erum einnig að skoða aðra mögulega leið, sem felur í sér að fjarskiptafyrirtækin komi upp viðvörunargluggum sem poppa upp þegar farið er inn á vefsíður þar sem áður hefur fundist efni sem sýnir kynferðislegt ofbeldi gegn börnum. Þá fær notandinn aðvörun um það. Þetta er til athugunar í samtali við fjarskiptafyrirtæki og Barnaheill.