Rannsóknir gefa til kynna að mikil neysla sykraðra drykkja sé ein meginorsök ofþyngdar og offitu. Meðal Norðurlandaþjóðanna er hlutfall offitu hæst á Íslandi, eða 21 prósent.
3. og 4. janúar, fer fram ráðstefna. þar sem kynnt er það sem er efst á baugi í líf- og heilbrigðisvísindum í Háskóla Íslands.
Meðal þess er rannsókn Lindu Bjarkar Árnadóttur lýðheilsufræðings sem bendir til þess að ef sykraðir drykkir yrðu skattlagðir um 20 prósent myndu Íslendingar léttast um 0,4 til 1,7 kíló á ári að meðaltali en alls sýndu fimm rannsóknir sem hún kynnti sér að tíðni offitu gæti lækkað á bilinu 1,3 til 3 prósent.
Markmið meistaraverkefnis Lindu var að taka saman niðurstöður rannsókna á áhrifum skattlagningar á sykruðum drykkjum á holdafar. Leitað var í gagnasöfnum að rannsóknum sem birtar höfðu verið fram til janúar 2015.
Rannsóknir Lindu fela einnig í sér vísbendingar um að áhrif skattlagningarinnar gætu aukist umtalsvert því hærri sem skatturinn er. Öllum rannsóknunum ber saman um að áhrif skattlagningar yrðu mest á neyslu ungs fólks og karlmanna, sérstaklega ungra karla, en
þær veita þó ekki einhlítt svar við því hversu mikil neysluáhrifin yrðu.
Offita í heiminum hefur nærri tvöfaldast á síðustu 30 árum. Á heimsvísu eru meira en 1,9 milljarðar fullorðinna
einstaklinga of feitir. Það er ljóst að fjárútlát skattgreiðenda vegna offitu eru talsverð. Samkvæmt skýrslu sem rannsóknarmiðstöð Háskólans á Bifröst gerði fyrir heilbrigðisráðuneytið árið 2008 kostaði offita íslenska samfélagið um 5,8 milljarða árið 2007. Stærstur hluti kostnaðarins fellur til vegna meðferðar offitutengdra sjúkdóma eða fylgikvillum offitu, svo sem sykursýki eða hjarta og æðasjúkdóma.
Samband milli verðs og neyslu
Gosdrykkjaneysla er mun meiri á Íslandi en öðrum Norðurlöndum, og hér er verðið langlægst. Virðisaukaskattur og vörugjöld
á gosdrykkjum og sykri hafa þó verið breytileg, og allt árið 2014 var vörugjald á gosdrykkjum, 21 kr. á lítra. Vörugjöld voru afnumin á
sykruðum matvælum 1. janúar 2015, og virðisaukaskattur á matvæli hækkaði jafnframt úr 7 prósent í 11 prósent.
Laufey Steingrímsdóttir prófessor í matvæla – og næringafræði. rekur samband verðlags og neyslu í fyrirlestri á þinginu. Þar kemur meðal annars fram að neysla gosdrykkja samkvæmt fæðuframboði náði hámarki á árunum
2001 til 2005 en þá var hún 154 lítrar á mann.