Björgunarmenn komust að og náðu íslenskum karlmanni á sjötugsaldri úr íshelli í Blágnípujökli á tólfta tímanum í gærkvöldi. Maðurinn var úrskurðaður látinn á vettvangi
Samferðafólk mannsins var flutt í skála í Kerlingafjöllum og verður flutt áfram þaðan til byggða. Veður hefur hamlað flugi og það var ekki fyrr en nú fyrir stundu að gat kom sem gerði flugmönnum LHG kleyft að fljúga af vettvangi. Aðrir sem að verkefninu komu eru á leið til byggða en sú ferð mun taka einhvern tíma.
Lögreglan á Suðurlandi fer með rannsókn á tildrögum slyssins en þau liggja ekki fyrir enn sem komið er.
Lögreglan þakkar björgunaraðilum öllum, hvort sem þeir koma úr björgunarsveitum, slökkviliðum, frá Landhelgisgæslu eða sjúkraflutningum nú eða ferðaþjóustuaðilum sem veittu mikilvæga aðstoð kærlega fyrir vinnuframlag þeirra og framlagningu á tækjum, búnaði og aðstöðu.
Uppfært kl. 21:50
Fyrstu menn eru nú komnir inn í íshellinn til leitar. Um 130 björgunarsveitarmenn eru á leið eða komnir á vettvang og eru þá liðsmenn slökkviliða og sjúkraflutninga ótaldir.
Uppfært kl. 21:00
Fyrstu björgunarsveitarmenn eru nú komnir á vettvang við íshellinn í Hofsjökli. Vitað er að styrkleiki brennisteinsvetnis er hár í hellinum enda voru þeir sem voru í samfylgd með manninum sem nú er leitað með mælitæki meðferðis.
Verkefni fyrstu manna er að setja upp búnað til björgunaraðgerða en lagt er upp úr því að það gerist hratt og örugglega en að öryggi björgunarmanna sé tryggt.
Þyrla LHG skilaði fystu mönnum í Kerlingafjöll en þaðan voru þeir fluttir með snjósleðum starfsmanna í Kerlingafjöllum á vettvang. Á vettvangi eru menn sem þekkja vel til á þessum slóðum og hafa leiðbeint um aðgerðir.
Lögregla hefur upplýst aðstandendur mannsins sem leitað er að um stöðu mála.
Aðgerðarstjórnstöð er í Björgunarmiðstöðinni við Árveg á Selfossi.
Eldra
Björgunarsveitir af Norður- og Suðurlandi ásamt þyrlu LHG með reykkafara frá Ísafirði eru nú á leið í íshelli í suðvestanverðum Hofsjökli. Þar er nú leitað að einum manni sem mun hafa farið inn í hellinn en ekki skilað sér þaðan aftur. Aðgerðin er umfangsmikil en öll vinna í hellinum mun þurfa að fara fram með aðfluttu lofti til björgunarmanna vegna hárra gilda SO2
Útkallið kom til lögreglunnar á Suðurlandi um kl. 18:00 í dag frá samferðafólki mannsins. Gert er ráð fyrir að fyrstu björgunarmenn verði komnir á staðinn með þyrlunni kl. 19:30 en gripið var til þess ráðs að manna hana með reykköfurum frá Ísafirði vegna þess að hún var stödd þar þegar útkallið kom.
Ekki er vitað hvað veldur því að maðurinn skilar sér ekki til baka úr hellinum.
The post Fannst látinn í íshelli á Blágnípujökli appeared first on Fréttatíminn.is.