415 milljóna klúður vegna braggans í Nauthólsvík, á ábyrgð Reykjavíkurborgar
Eins og frægt er orðið, þá fóru framkvæmdir við braggann í Nauthólsvík verulega úr böndunum og enginn hefur þurft að sæta ábyrgð á neinu varðandi það klúður.
Upphafleg kostnaðaráætlun hljóðaði upp á 158 milljónir en framkvæmt hefur verið fyrir 415 milljónir, samkvæmt upplýsingum frá Reykjavíkurborg.
Bara salernið í bragganum kostaði 46 milljónir og er án efa dýrasta náðhús landsins.
Við Nauthólsveg 100 stendur þyrping húsa sem reist voru árið 1943 sem gistihús fyrir þá sem áttu leið um Reykjavíkurflugvöll og hét á sínum tíma Hotel Winston. Bragginn er orðinn að matsölustað, náðhúsið verður brátt að fyrirlestrarsal fyrir Háskólann í Reykjavík og skálinn að frumkvöðlasetri.
Kópavogsbær dreif í að rífa bragga sem er frá sama tíma og sá í Nauthólsvík
Verktakar í Kópavogi hafa rifið niður græna braggann á Kársnesi sem er einnig frá stríðsárunum. Engar athugasemdir hafi borist vegna niðurrifsins og var bragginn horfinn af yfirborði jarðar í gær og áformað er að byggðar verði 86 íbúðir á lóðinni í staðinn.
Vegna umfjöllunar um endurbyggingu bragga og annarra húsa í Nauthólsvík vill Minjastofnun Íslands koma eftirfarandi á framfæri.
Kristín Huld Sigurðardóttir forstöðumaður Minjastofnunar, segir að Minjastofnun hafi ekki sett fram kröfur um endurgerð húsa í Nauthólsvík, bragga, skála og náðhúss, enda falla húsin ekki undir ákvæði laga um menningarminjar nr. 80/2012 sem stofnunin starfar eftir.
Samkvæmt lögunum getur ráðherra friðlýst hús samkvæmt tillögu Minjastofnunar og hefur ekki verið gerð tillaga að friðlýsingu bygginga við Nauthólsvík. Einnig kveða lögin á um að öll hús sem eru 100 ára eða eldri séu friðuð og að leyfi Minjastofnunar þurfi til breytinga á þeim. Að auk er skylt að leita álits Minjastofnunar varðandi breytingar á húsum sem byggð eru 1925 eða fyrr. Byggingar við Nauthólsvík eru frá tímum síðari heimstyrjaldar og því á hvorugt þessara ákvæða við um þau.
Bent skal á að samkvæmt deiliskipulagi Nauthólsvíkur sem Reykjavíkurborg lét vinna og samþykkti árið 1998 var gert ráð fyrir stríðsminjasafni í endurbyggðum bröggum á svæðinu þar sem umræddur braggi stendur.
Reykjavíkurborg breytti deiliskipulagi Nauthólsvíkur árið 2013 í þá veru að fallið var frá því að þar skyldi verða stríðsminjasafn en í staðinn yrði þar veitingarekstur og þjónusta. Í skilmálum fyrir byggingar í deiliskipulagi borgarinnar með breytingu 2013 segir: „Leyfileg er endurbygging á núverandi byggingum sem tekur mið af upprunalegri stærð og útiliti“.
Árið 2016 leituðu A-arkitektar eftir áliti Minjastofnunar á fyrirhugaðri endurgerð húsa frá lokum seinni heimsstyrjaldar við Nauthólsveg 100. Þótt ekki sé skylt samkvæmt lögum að leita álits Minjastofnunar á endurgerð húsa sem byggð eru eftir 1925, þá veitir Minjastofnun álit á breytingum á yngri húsum ef eftir því er leitað. Slíkt álit er leiðbeinandi en ekki bindandi fyrir þá sem eftir því leita.
Minjastofnun veitti slíkt álit með bréfi til A-arkitekta þann 25. júlí 2016 og eins og þar kemur fram fagnaði stofnunin farsælli lausn á endurbyggingu húsanna og taldi að með tillögunni tækist vel að varðveita sérkenni merkra sögulegra minja frá stríðsárunum um leið og húsin eru aðlöguð að nýrri starfsemi.
Minjastofnun Íslands vill árétta að ákvarðanir um endurgerð braggans og annarra húsa í Nauthólsvík eru á ábyrgð Reykjavíkurborgar enda í samræmi við gildandi deiliskipulag Nauthólsvíkur.