Reggílistamaðurinn Rocky Dawuni, er væntanlegur til landsins og mun halda tónleika ásamt hljómsveit sinni í Gamla bíói á sunnudaginn, 30. ágúst.
Rocky er talsmaður margra mannúðarsamtaka eins og UNICEF og Carter Center og hefur m.a. leitt verkefni stofnað af Hillary Clinton á vegum Sameinuðu Þjóðanna með leikkonunni Juliu Roberts og fleirum, sem snýr að því að bæta eldunaraðstöðu fólks í Afríku, en yfir tvær milljónir manna látast á hverju ári út af slæmri eldunaraðstöðu. Rocky hefur deilt sviði með stjörnum eins og Stevie Wonder, Peter Gabriel, Bono, Jason Mraz og fleirum og hefur CNN sett hann á lista yfir 10 bestu tónlistarmenn frá Afríku.
Einnig hefur tónlist hans hljómað í sjónvarpsþáttunum ER, Weeds og Dexter sem og í tölvuleikjum FIFA. Í tilefni af komu Rocky Dawuni ætlar Gamla bíó að efna til reggídags 30. ágúst sem mun hefjast á fjölskyldutónleikum kl. 15.00, þar sem vinsælasta reggíhljómsveit Íslands, AmabAdamA, mun spila en hún mun líka stíga á svið kl. 21.00, áður en Rocky Dawuni og hljómsveit hefja leik.
Frítt er inn á fjölskyldutónleikana fyrir 10 ára og yngri en 1.000 kr. fyrir aðra.
Allar nánari upplýsingar má finna á www.gamlabio.is
The post Reggígoðsögn kemur til landsins appeared first on FRÉTTATÍMINN.