Það að eignast barn og stofna til fjölskyldu er dásamleg tilfinning fyrir þá sem það kjósa, þessu fylgir oftsinnis mikið álag, streita, lítill svefn og áhyggjur af þessum einstaklingi sem kemur í heiminn og fetar sín fyrstu skref í lífinu. Þá er sterk sú ábyrgðartilfinning og von um að allt fari vel, ekki komi til veikinda eða neinna meiriháttar áfalla. Það bærast alls kyns tilfinningar innra með foreldrum bæði á meðgöngunni, í gegnum fæðinguna og svo á uppvaxtarárunum. Þetta er líflegur tími og ákveðin rússíbanareið sem maður hefur ákveðið að taka þátt í. Það verður ekkert hoppað af vagninum í miðri braut og allra síst ef hann er á hvolfi. Þetta getur þó verið flókið samspil fyrir suma og eins og við þekkjum endast ekki öll sambönd, ástin getur kulnað og ýmis vandamál komið upp sem leiða til skilnaðar eða slita á samvistum, því miður. Börnin lenda oft á milli í slíkum deilum með tilheyrandi vanlíðan fyrir alla aðila og oftsinnis er ákvörðun um sambandsslit slegið á frest barnanna vegna sem er líklega ekki rétt nálgun á vanda sambúðarfólks. Á sama hátt mætti segja að það sé ólíklegt til árangurs að gifta sig ef maður er óviss um samband sitt eða að eignast börn til að reyna að bjarga því.
Þá eru þeir til sem kjósa að eignast ekki börn, eða geta það ekki einhverra hluta vegna, sem getur haft veruleg áhrif á líf og líðan þeirra einstaklinga. Í því samhengi eru til margar leiðir að barnaláni og misflóknar en með nýrri tækni og frekari möguleikum í læknisfræði hefur verið mögulegt að gera fjölda para kleift að eignast börn auk þess sem ættleiðingar hafa aukist á undangengnum árum. En eru einhverjar leiðir til þess að tryggja að allt fari vel, barnið dafni og sambandið endist svo að fjölskyldan verði þess aðnjótandi að upplifa allar þær hæðir og lægðir, stórar og smáar, sem fylgja því að fara í gegnum lífið og tilveruna eins og það er orðað? Auðvitað ekki, en það má gefa góð ráð sem geta verið grundvöllur velgengni sem hver og ein fjölskylda þróar svo með sínum hætti.
„Foreldrar ungbarna ættu að hafa vaktaskipti til að ná upp töpuðum hvíldartíma.“
Hægt er að skipta þessu upp í nokkra þætti sem allir eru mikilvægir og ber þá fyrst að telja heilsusamlegt líferni sem útheimtir að nota ekki tóbak, hreyfa sig reglubundið, borða fjölbreytta og sem minnst unna fæðu auk þess að lágmarka sykur- og áfengisneyslu. Fá nægan svefn, foreldrar ungbarna ættu til dæmis að hafa vaktaskipti til að ná upp töpuðum hvíldartíma. Sinna ráðlögðum forvörnum fyrir sjálfa sig og börnin, ekki hvað síst bólusetningum þeirra. Rækta og elska sjálfan sig svo þú getir elskað aðra. Jákvæð samskipti, temja sér að hrósa öðrum auk þess að veita uppbyggilega gagnrýni og vera reiðubúinn að taka á móti slíkri án þess að fara í vörn. Tala um vandamál sín og líðan og reyna í sameiningu að leysa þau. Vinna í þeim málum sem maður getur haft áhrif á og forgangsraða. Síðast en ekki síst hellingur af þolinmæði því það er ekki líklegt að allir þessi þættir gangi jafn auðveldlega fyrir sig og þeir eru settir hér fram. Gangi ykkur vel !
Teitur Guðmundsson, læknir
The post Fjölgun á heimilinu appeared first on Fréttatíminn.