Langvinn lungnateppa er samheiti yfir ýmsa sjúkdóma, m.a. lungnaþembu, langvinna berkjubólgu og reykingalungu. Um er að ræða bólguástand sem leiðir til ertingar í berkjunum, aukinnar slímmyndunar og stækkunar og eyðileggingar á lungnablöðrunum. Lungnateppa einkennist af hósta og mæði sem versnar smám saman með árunum. Nauðsynlegasta „meðferðin“ er að hætta að reykja. Lokastig sjúkdómsins er í raun mjög kvalafullur dauðadagi þar sem sjúklingurinn nánast kafnar hægt og rólega.
Hvað er til ráða?
Það er ekki hægt að lækna langvinna lungnateppu en til er meðferð sem léttir á einkennum og minnkar líkur á fylgikvillum og felst hún í lífsstílsbreytingum, lyfjameðferð og þjálfun.
Lífsstílsbreytingar:
- Meiri vatnsdrykkja. Ef drukkin eru 8-10 glös yfir daginn þynnist lungnaslímið. Þetta skal þó gert í samráði við lækni ef sjúklingur er t.d. með alvarlegan hjartasjúkdóm samfara.
- Leita samstundis meðferðar við berkjusýkingum.
- Forðast óbeinar reykingar.
- Forðast skyndilegar hitabreytingar og kalt og blautt veður.
- Öll hreyfing er af hinu góða hversu lítil sem hún er og röskir göngutúrar geta haldið lungnastarfseminni við og jafnvel bætt hana.
- Reykingafólk ætti strax að hætta að reykja. Þær skemmdir sem hafa orðið á lungnavefnum ganga ekki til baka en hægt er að draga úr framvindu sjúkdómsins og stöðva frekari skemmdir. Forðast ætti kringumstæður sem erta eins og reyk og svælu.
Heimild: doktor.is
The post Langvinn lungnateppa appeared first on Fréttatíminn.