Árlegt samráð við Bandaríkin um öryggis- og varnarmál fór fram í dag í utanríkisráðuneytinu og voru tvíhliða samskipti ríkjanna, samstarf innan Atlantshafsbandalagsins og málefni norðurslóða meðal helstu umræðuefna, auk varnaræfingarinnar Trident Juncture sem nú stendur yfir á Íslandi.

Fyrir hönd Íslands leiddi Sturla Sigurjónsson, ráðuneytisstjóri utanríkisráðuneytisins, viðræðurnar, en í íslensku sendinefndinni voru jafnframt embættismenn úr forsætisráðuneyti, utanríkisráðuneyti, dómsmálaráðuneyti og frá embætti ríkislögreglustjóra og Landhelgisgæslu Íslands.

Fyrir bandarísku sendinefndinni fóru Michael Murphy, aðstoðarráðherra úr utanríkisráðuneytinu, og Thomas Goffus, aðstoðarráðherra úr varnarmálaráðuneyti Bandaríkjanna.

Katrín Jakobsdóttir, forsætisráðherra, mælti fyrir frumvarpi til laga um breytingar á lögum um umboðsmann barna í vikunni. Breytingar þær sem lagðar eru til er m.a. ætlað að styrkja rödd og auka áhrif barna í samfélaginu.

Á meðal breytinga í frumvarpinu er að á tveggja ára fresti verði haldið sérstakt barnaþing sem verður umfjöllunarvettvangur um stöðu og hagsmuni barna og ungmenna hér á landi og í alþjóðlegu samhengi. Þar munu börn hvaðanæva af landinu koma saman og ræða þau mál sem þeim hugnast.

Í frumvarpinu er einnig lagt til að lögfestur verði sá ráðgjafahópur sem umboðsmaður barna hefur starfrækt að eigin frumkvæði undanfarin ár, en tólf börn á aldrinum 12-17 ára hafa verið í hópnum hverju sinni.

Að lokum má nefna að lagt er til að umboðsmanni barna verði falið að safna gögnum um stöðu barna á Íslandi með markvissum hætti. Með þeim hætti verður tryggð heildstæð sýn á málefni barna og miðlæga öflun og miðlun gagna og upplýsinga um aðstæður barna. Slík gagnaöflun er nauðsynleg þegar kemur að því að taka stefnumótandi ákvarðanir er varða börn.

Katrín Jakobsdóttir, forsætisráðherra:
„Börn eiga að hafa um það að segja hvernig samfélagið er. Börn hafa rétt á að láta skoðanir sínar í ljós um samfélagsleg málefni og við eigum að hlusta eftir þeim. Samfélög eru ekki síst mæld eftir því hvernig þau koma fram við börn og hvernig þau tryggja að öll börn fái tækifæri til að þroska hæfileika sína þannig að þau nái að dafna og fylgja draumum sínum eftir. Til þess þarf rödd barna að fá að heyrast og þeir sem eldri eru að vera reiðubúnir að hlusta.“

Um 850 km SV af Reykjanesi er vaxandi 980 mb lægð sem fer NA. Milli Jan Mayen og Scoresby-sunds er minnkandi 989 mb lægð á leið norður.

Hér er hægt að fylgjast með lægðinni

Veðurhorfur á landinu
Suðvestan 5-13 m/s og skúrir, en léttskýjað norðaustan og austanlands. Suðaustan 13-20 í nótt með talsverðri rigningu sunnan- og vestanlands. Snýst í suðvestan 15-25 m/s fyrir hádegi, hvassast á Norðvesturlandi. Hviður allt að 40 m/s við fjöll. Rigning, en síðar skúrir sunnan- og vestanlands. Hiti 2 til 8 stig.

Höfuðborgarsvæðið
SV 15-23 m/s. (Gult ástand)
Hvassviðri eða stormur, 15-23 m/s. Varhugaverðt fyrir vegfarendur með aftanívagna eða á ökutækjum sem taka á sig mikinn vind. Einnig geta verið hvassir sviftivindar í efribyggðum og við háar byggingar. Fólk er hvatt til að sýna aðgát og ganga frá lausum munum til að forðast tjón.

Suðurland
SV 15-23 m/s (Gult ástand)
SV hvassviðri eða stormur, 15-23 m/s. Varasamt fyrir ökutæki sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum til að forðast tjón.

Faxaflói
SV 15-23 m/s (Gult ástand)
SV hvassviðri eða stormur, 15-23 m/s. Varasamt fyrir ökutæki sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum til að forðast tjón.

Breiðafjörður
SV 15-25 m/s (Gult ástand)
Hvassviðri eða stormur, 15-25 m/s. Búast má við mjög snörpum vindhviðum við fjöll, staðbundi yfir 40 m/s, einkum á norðanverðu Snæfellsnesi og í Dölunum. Varasamt fyrir ökutæki sem taka á sig mikinn vind og afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum til að forðast tjón.

Vestfirðir
SV 15-23 m/s (Gult ástand)
SV hvassviðri eða stormur, 15-23 m/s sunnan- og austantil. Norðanvert Djúpið sleppur. Búast má við mjög snörpum vindhviðum við fjöll x- x m/s, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Strandir og Norðurland vestra

SV stormur (Gult ástand)
Hvassviðri eða stormur, 15-25 m/s. Búast má við mjög snörpum vindhviðum við fjöll allt að 40 m/s, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Norðurland eystra
SV 15-23 m/s (Gult ástand)
Hvassviðri eða stormur, 15-23 m/s. Búast má við mjög snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Austurland að Glettingi
SV 15 -23 m/s (Gult ástand)
SV hvassviðri eða stormur, 15 -23 m/s. Búast má við mjög snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Austfirðir
SV 15 -23 m/s (Gult ástand)
SV hvassviðri eða stormur, 15 -23 m/s með mjög snörpum vindhviðum við fjöll sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Suðausturland
SV 15 -23 m/s (Gult ástand)
SV hvassviðri eða stormur, 15 -23 m/s með mjög snörpum vindhviðum við fjöll sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Miðhálendið
SV 18-30 m/s (Gult ástand)
Stormur eða rok, 18-30 m/s. Fólki bent á að sýna varkárni og fylgjast með veðurspám

Verður okkur kennt um hlýnun jarðar næst?

,,Það er dapurlegt að fylgjast með orðræðunni sem spunameistarar auðvaldsins gubba út úr sér þessa dagana. Krónan fellur vegna þess að nýtt fólk er komið í brúna í verkalýðshreyfingunni. Vörurverð hækkar, vaxtahækkunum og uppsögnum hótað því okkur dirfist að krefjast þess að fólk geti lifað með mannlegri reisn af lágmarkslaunum.

Verðbólguvæntingar hafa aukist til muna í fjármálakerfinu og sleikja nú eflaust margir fjármagnseigendur munninn ef þeir eru ekki þegar farnir með peningana úr landi, sem aftur hefur áhrif á gengið og verðbólguvæntingar og hærra vöruverð.

Er þessi staða á ábyrgð nýrrar forystu verkalýðshreyfingarinnar?
Hver er ábyrgð auðstéttarinnar sem í taumlausri græðgi sinni er tilbúið að fórna lífskjörum heildarinnar fyrir skammtímagróða með gengisfellingum, skattaundanskotum eða öllum öðrum tiltækum ráðum, hvað sem það kostar.

Engu verður deilt með sótsvörtum og lúsugum lýðnum.
Er kröfugerð okkar óábyrg?
Er kröfugerð okkar svo svívirðileg að ekkert verður við ráðið og hér verður sviðnari jörð eftir kjarasamninga en varð eftir sjálft hrunið?
Sannleikurinn er sá að kröfugerð okkar er sanngjörn. Hún er ábyrg í alla staði og er góð fyrir fyrirtækin og fólkið í landinu.
Hún er samfélagslega ábyrg.

Til að taka af allan vafa þá höfum við í VR kostnaðar reiknað allar okkar kröfur vandlega. Við höfum reiknað það svigrúm sem við teljum hagkerfið þola úr prósentum yfir í krónur.

Með prósentuhækkunum fá þeir sem hæst hafa launin flestu krónurnar. Við tökum krónurnar sem eru til skiptanna og deilum þeim jafnt yfir á alla.
Þetta mun koma sér vel fyrir alla tekjuhópa. Og atvinnulífið. Og skattkerfið.

Við viljum koma af stað þjóðarátaki í húsnæðismálum og nota til þess hugmyndir sem hafa ekki komið fram áður og kosta atvinnulífið ekki eina einustu krónu, heldur til tekna. Lausnir sem munu auka búsetuöryggi og ráðstöfunartekjur félagsmanna okkar um tugi og jafnvel hundruð þúsunda án aukins kostnaðar fyrir ríkið, sveitarfélögin eða fyrirtækin.

Við viljum afnema verðtryggingu á neytendalánum og lækka vexti sem aftur mun til lengri tíma auka ráðstöfunartekjur heimila og lækka kostnað fyrirtækja. Kostar ekki neitt!

Við viljum stytta vinnuviku til að auka starfsánægju og byggja upp fjölskylduvænna samfélag án þess að það komi niður á framleiðni eða kostnaði.

Við viljum auka ráðstöfunartekjur lægri og millitekjuhópa í gegnum sanngjarnara skattkerfi sem ekki verður séð að verði til kostnaðarauka fyrir fyrirtækin en velta þeirra mun augljóslega aukast mikið.
Hvað í ósköpunum í þessum kröfum er ógn við stöðugleika eða atvinnulífið?

Hvernig má það vera slæmt fyrir atvinnulífið eða hagkerfið þegar augljóst er að þær ráðstöfunarkrónur sem krafist er um munu skila sér nær óskiptar út í samneysluna?

Hvernig má það vera ógn við stöðugleika að krefjast þess að fólk geti lifað með mannlegri reisn af dagvinnulaunum?

Kröfur okkar munu auka veltu fyrirtækja til mikilla muna. Það gerist með áherslu á aukna kaupgetu hópa í okkar samfélagi sem ná ekki endum saman. Aukin velta fyrirtækja auka getu þeirra til að borga hærri laun og ráða fleira fólk eða lækka vöruverð. Nú eða greiða eigendum sínum meiri arð.
Innflúensufaraldur hræðsluáróðurs hagsmunaafla atvinnulífsins hafa smitast út í samfélagið, vöruverð og þjónustu en samt hefur ekki verið samið um eitt eða neitt.

Verðbólgan er farin að banka á dyrnar og býður eftir því að hreiðra um sig í hlýjum verðtryggðum lánasamningum þjóðarinnar.

Þetta er allt saman því að kenna að nýja fólkið í verkalýðshreyfingunni er að krefjast mannsæmandi lífskjara.
Verður okkur kennt um hlýnun jarðar næst?

Svo eru tekin viðtöl við „fræðimenn“ sem kostuðu þjóðina æru og auð með falsgreiningum sínum, þar sem þeir spá dómsdegi verði lífskjör almennings bætt. Svo er það látið athugasemdalaust að viðkomandi sé jafnframt ráðgjafi viðbjóðslegustu hræGamma samfélagsins og kennir svo unga fólkinu bullið og vitleysuna, sem þeir komust upp með fyrir hrun, í Háskólum landsins.

Í fréttum gærdagsins kom fram að fjármagn streymir úr landi sem gæti verið vegna „hræðslu“ við kröfur verkalýðshreyfingarinnar. Ætli þetta sé sami hópurinn og greiðir hlutfallslega minnst til samfélagsins, samkvæmt tekjur.is? Hver er ábyrgð þessa fólks?

Er efnaðasta fólki landsins svona nákvæmlega andskotans sama um þjóðina, börnin okkar og fólkið sem skrapar tekjubotninn og sannanlega býr til auð þeirra?

Mér persónulega finnst þessi orðræða og framkoma auðstéttarinnar viðbjóðsleg og er þá vægt til orða tekið.
Nú þarf þjóðin heldur betur að standa í lappirnar. Við þurfum að dusta rykið af gömlum gildum og ná vopnum okkar í þessu ömurlega orðræðustríði og viðbjóðslega áróðri.

Við þurfum að þjappa okkur á bakvið verkalýðshreyfinguna og berjast fyrir raunverulegum kerfisbreytingum og nýjum gildum.

Setjum þrælslundina í pappírstætarann og stéttarvitund og samstöðu í ljósritunarvélina og dreifum að vild.

Uppgjöf okkar er sigur þeirra og ávísun á lífskjör komandi kynslóða.
Uppgjöf er ekki valkostur lengur!
Samaneinuð erum við ósigrandi.” Segir Ragnar Þór Ingólfsson um hræringar á fjármálamörkuðum sem að hafa verið að undanförnu og stöðu launþega.

Sádi-arabísk stjórnvöld viðurkenna að blaðamaðurinn Jamal Khashoggi hafi látið lífið inni á ræðismannsskrifstofu Sáda í Istanbúl. Þetta kemur fram í ríkisfjölmiðli Sádi Arabíu í kvöld skv CBS fréttastofunni.

Ríkissaksóknari Sádi Arabíu segir að hann hafi lent í áflogum við menn sem hann hitti þar inni, þeir hafi slegist og höggin hafi orðið honum að bana. Ekki er vitað hvar líkið af honum er.

Stjórnvöld í Sádi Arabíu hafa ákveðið að reka yfirmann leyniþjónustunnar, Ahmad al-Assiri, eftir rannsóknina á hvarfi Khashoggis. Fyrr í vikunni var greint frá því að til væru myndbands- og hljóðupptökur sem staðfesti að Khashoggi hafi verið pyntaður og myrtur.

Hjá Höllu opnar á Keflavíkurflugvelli

Veitingastaðurinn Hjá Höllu opnaði formlega í gær í suðurbyggingu Flugstöðvar Leifs Eiríkssonar á Keflavíkurflugvelli þar sem gengið er út í hlið C á flugvellinum. Hjá Höllu var með hagstæðasta tilboðið í samkeppni um útleigu á aðstöðu undir veitingaþjónustu sem fram fór síðastliðið vor. Veitingastaðurinn er rekinn af Höllu Maríu Svansdóttur sem hefur rekið veitingastað undir sama merki í Grindavík við góðan orðstír. Gerður var 4 ára samningur um reksturinn.

Hjá Höllu býður uppá eldbakaðar súrdeigspítsur, ferskan fisk frá Grindavík, fersk salöt sem og úrval rétta til að taka með sér í flug. Búið er að koma fyrir stórum gaseldofni þar sem pítsurnar eru bakaðar við háan hita á aðeins 90 sekúndum. Þeir farþegar sem eru hvað mest að flýta sér geta gripið með sér tilbúnar pítsusneiðar.
Halla María Svansdóttir:

„Við erum mjög spennt að hefja nú rekstur á staðnum en opnunin er búin að vera í undirbúningi í sumar, allt frá því að samkeppninni lauk. Það er búið að vera mikil áskorun að setja upp stað sem þennan í flugstöðinni enda fjölmörg atriði sem þarf að hafa í huga í slíku verkefni með allan þann fjölda farþega sem fer hér um á hverjum degi. Viðtökurnar hafa verið afar góðar hingað til en staðurinn var opnaður til prufu fyrir nokkru síðan. Við bjóðum alla þá sem huga á ferðalög úr landi velkoma til okkar og prófa það sem við höfum uppá að bjóða.“

Fjölmenni var við opnun staðarins í gær fimmtudaginn 18. október og er staðurinn spennandi viðbót við þann fjölda veitingastaða sem fyrir eru í flugstöðinni. Meðfylgjandi eru myndir frá opnuninni.

Nóg var að gera hjá lögreglunni á Höfuðborgarsvæðinu frá því í gærkvöld og í alla nótt, en helstu verkefni skv. dagbók hennar snúa að afskiptum af ölvunar- og fíkniefnaakstri.

Klukkan rúmlega tvö í nótt, veitti lögreglan eftirför, ökumanni sem virti ekki fyrirmæli um að stöðva bifreiðina.

Ökumaðurinn var að lokum stöðvaður við Bolöldu eftir að lögreglubifreið hafði verið ekið utan í bifreið ökuníðingsins. Ökumaðurinn reyndist vera í mjög annarlegu ástandi og var vistaður í fangaklefa. Annar ökumaður var stöðvaður skömmu fyrir klukkan eitt í nótt er lögreglan hafði afskipti af ökumanni sem stöðvaði ekki við stöðvunarskyldu við gatnamót. Ökumaðurinn reyndist við nánari athugun vera ölvaður.

Rúmlega níu í gærkvöld var ekið á staur í miðbænum. Ökumaður sem var einn í bifreiðinni meiddist ekki en er grunaður um að aka bifreiðinni undir áhrifum vímuefna. Háftíma síðar var ökumaður stöðvaður í Grafarvogi, grunaður um akstur undir áhrifum fíkniefna en einnig fundust fíkniefni á honum.

Rétt fyrir klukkan 23:00 var ökumaður stöðvaður í Kópavogi, fyrir akstur undir áhrifum áfengis auk þess sem hann var sviptur ökuréttindum og í Reykjavík voru svo þrír ökumenn til viðbótar stöðvaðir vegna fíkniefnaaksturs.

Konu hefur verið stefnt fyrir ærumeiðandi ummæli og ósönn vegna meintrar nauðgunar

Þetta kemur fram í stefnu Vil­hjálm­s H. Vil­hjálms­sonar lögmanns, gegn konunni fyrir hönd skjólstæðinga sinna

Héraðssak­sókn­ari ákvað að ákæra ekki menn fyr­ir meinta nauðgun í íbúð við Miklu­braut en brotið átti að hafa átt sér stað í september 2015. Annað mál gagn­vart mann­in­um og fé­laga hans var einnig fellt niður.

Vil­hjálm­ur H. Vil­hjálms­son, lögmaður staðfest­i þá að skv. ákvörðun héraðssak­sókn­ara væru ekki tald­ar lík­ur á sak­fell­ingu fyr­ir dómi miðað við þau gögn sem lágu fyr­ir í mál­inu. En það hafði m.a. komið fram í opinberum miðli að íbúðin í Hlíðunum hefði verið búin út­búnaði til of­beld­isiðkun­ar og að árás­irn­ar hefðu verið hrotta­leg­ar. Mik­ill fjöldi fólks safnaðist sam­an fyr­ir utan lög­reglu­stöðina á Hverf­is­götu og krafðist þess að menn­irn­ir tveir yrðu tafarlaust hneppt­ir í gæslu­v­arðhald og fátt var um annað talað á Íslandi í marga daga á eftir og á sam­fé­lags­miðlum voru nöfn þeirra m.a. birt og mynd­ir af þeim og barni ann­ars þeirra.

Nú hefur Vilhjálmur H. Vilhjálmsson hæstaréttarlögmaður, verjandi mannana stefnt konu á fimmtugsaldri sem er búsett í Sviss og mun höfða mál gegn henni fyrir Héraðsdómi Reykjavíku til ómerkingar á meintum ærumeiðandi ummælum og greiðslu miskabóta vegna friðarbrots og ærumeiðinga á Facebook og Twitter notendasvæðum, sem að áttu sér stað þann 9. nóvember árið 2015.

Dómkröfur fyrir dómi eru m.a. skv. stefnunni : Ómerkingarkröfur þar sem að mennirnir gera hvor um sig þá kröfu að eftirfarandi ummæli verði dæmd dauð og ómerk:

Twitter færsla, 9. nóvember 2015, kl. 03.48.
1. Be warned, serial rapists on the loose in Northern Europe …

Facebook færsla, 9. nóvember 2015, kl. 12.37.
2. Be warned: serial rapists on the loose in Northern Europe. They drug young women and then rape them in a special equipped flat for raping.
3. The Icelandic police has failed to protect us from these monsters so they are free to travel and rape more women.

Facebook færsla, 9. nóvember 2015, kl. 14.35.
4. The Icelandic police is now forced to defend their irresponsible actions of releasing serial rapists …

Mennirnir gera hvor um sig þá kröfu, að konan verði dæmd til þess að greiða hvorum þeirra um sig miskabætur að fjárhæð krónur 2.000.000 með vöxtum frá 9. nóvember 2015 til 27. maí 2016, auk dráttarvaxta. Þess er jafnframt krafist að konan verði dæmd til að greiða mönnunum hvorum um sig málskostnað samkvæmt síðar framlögðu málskostnaðaryfirliti eða mati héraðsdóms. Þá er þess krafist að konan beri refsi- og fébótaábyrgð á ummælunum

Þá er einnig áskilinn réttur til þess að höfða sérstakt dómsmál á hendur konunni, þegar leitt er í ljós hvort að mennirnir hafi orðið fyrir varanlegri örorku og miska vegna umfjöllunarinnar. Skv. því sem sagt er í stefnunni.

Málsatvik eru skv. stefnunni, þau að þann 9. nóvember 2015 kl. 03.48 skrifaði konan og birti færslu á Twitter þar sem hún varaði fólk við stefnendum og kallaði þá raðnauðgara („serial rapists“). Með færslunni fylgdi mynd með upplýsingum um nöfn stefnenda og Facebook svæði þeirra.

Sama dag kl. 12.37 skrifaði og birti konan svipaða færslu á Facebook, en auk þess að vara við stefnendum þá bætti hún því við að þeir væru raðnauðgarar, sem dópuðu konur og nauðguðu þeim svo í íbúð sérstaklega útbúinni til nauðgana. Þá kallaði hún stefnendur skrímsli („monsters“) og sagði að lögreglan hefði brugðist konum með því að vernda þær ekki fyrir stefnendum og þeir gætu þar af leiðandi nauðgað fleiri konum. Færslan var opin og skrifuð á ensku svo hún næði til sem flestra. Með henni fylgdu hlekkir á fréttir um meint kynferðisbrot stefnenda auk upplýsinga um nöfn þeirra og Facebook svæði. Segir í stefnu mannanna.

,,Konan skrifaði og birti aðra færslu á Facebook tveimur tímum síðar eða kl. 14.35. Sú var einnig á ensku, og með henni lofar stefnda mátt samfélagsmiðla, þar sem nú væri lögreglan tilneydd til að svara fyrir ábyrgðarlausar gjörðir sínar sem fælust í því að sleppa raðnauðgurum úr haldi. Þetta væri allt þökk sé því að svo margir hefðu deilt upplýsingum um kynferðisbrot stefnenda. Að auki skrifaði stefnda og birti ummæli á Facebook þar sem hún sagðist vera búin að birta upplýsingar um stefnendur og meint kynferðisbrot þeirra á notendasvæði sínu og hún væri búin að vara tvo vini sína við þeim sem hefðu hefðu fjarlægt þá af vinalista sínum á Facebook.
Með kröfubréfi, dags. 27. apríl 2016, var konunni boðið að ljúka málinu utan réttar en hún kaus að svara því bréfi ekki. Stefnendum er því nauðugur einn sá kostur að höfða dómsmál þetta til þess að verja æru sína og friðhelgi einkalífs.” Segir í stefnunni.

Þá segir jafnframt í stefnunni ,, að með ummælum hennar á Facebook og Twitter var mönnunum gefin að sök refsiverð háttsemi sem varðar við almenn hegningarlög. Konan kallaði stefnendur ítrekað raðnauðgara sem byrluðu konum ólyfjan og nauðguðu þeim í íbúð sem þeir hafi sérútbúið til verknaðarinns. Þá gaf hún í skyn að þeir stunduðu það ítrekað að nauðga konum og myndu halda því áfram þar sem lögreglan hefði ekki krafist gæsluvarðhalds yfir þeim og þeir gengju því lausir. Með því hefði lögreglan brugðist konum því stefnendur væru hættuleg skrímsli sem ættu að vera innilokuð. Mennirnir byggja á því að í ummælubum felist ásakanir um að þeir hafi gerst sekir um ítrekuð og alvarleg hegningalagabrot. Öll ummæli konunnar séu ósannur uppspuni og eru til þess fallin að meiða æru stefnenda. Hér að neðan verður gerð nánari grein fyrir hverjum og einum ummælum sem krafist er ómerkingar á og hvers vegna beri að ómerkja ummælin.

1. Be warned, serial rapists on the loose in Northern Europe …
Með ofangreindum ummælum fullyrðir stefnda og varar fólk við því að stefnendur séu raðnauðgarar sem gangi lausir og liðugir í Norður Evrópu. Með ummælum er fullyrt að stefnendur hafi ítrekað gerst sekir um nauðgun en allt að 16 ára fangelsi liggur við slíku broti skv. 194. gr. alm. hgl.

2. Be warned: serial rapists on the loose in Northern Europe. They drug young women and then rape them in a special equipped flat for raping.
Hér fullyrðir stefnda á nýjan leik og varar fólk við því að stefnendur séu raðnauðgarar sem gangi lausir og liðugir í Norður Evrópu. Því til viðbótar fullyrðir stefnda að stefnendur byrli ungar stúlkur ólyfjan og nauðgi þeim síðan í íbúð sérútbúinni til nauðganna. Sem fyrir varða brotin sem stefnda gefur stefnendum að sök allt að 16 ára fangelsi.

3. The Icelandic police has failed to protect us from these monsters so they are free to travel and rape more women.
Með ofangreindum ummælum ásakar stefnda lögregluna um að hafa mistekist að vernda borgarana fyrir stefndum sem séu skrímsli sem sé nú frjálst að ferðast um heiminn og nauðga fleiri konum. Hér fullyrðir stefnda fyrirvaralaust að stefnendur hafi í hyggju að nauðga fleiri konum. Sem fyrr varða brotin sem stefnda gefur stefnendum að sök allt að 16 ára fangelsi.

4. The Icelandic police is now forced to defend their irresponsible actions of releasing serial rapists …
Hér kallar stefnda stefnendur raðnauðgara á nýjan leik. Um rökstuðning vísast til umfjöllunar hér að ofan.

Stefnda deildi einnig upplýsingum um nöfn og Facebook síður stefnenda, bæði á Twitter og Facebook. Þá hafði hún þar að auki persónulega samband við vini stefnenda á Facebook og varaði við þeim. Með því braut hún gegn réttarreglum sem ætlað er að vernda friðhelgi einkalífs stefnenda, sbr. 229. gr. laga nr. 19/1940, 71. gr. stjskr. og 1. mgr. 8. gr. MSE.”

Þá segir jafnframt að stefnda hafi svipt mennina grundvallarmannréttindum og úthrópaði þá sem nauðgara án þess að þeir hafi verið ákærðir fyrir slíka háttsemi hvað þá heldur dæmdir. Öll ummælin feli í sér ásökun um refsiverða og siðferðislega ámælisverða háttsemi. Öll ummæli stefndu eru ærumeiðandi aðdróttanir og fela í sér brot gegn almennum hegningarlögum. Hin umstefndu ummæli séu ósönn, óviðurkvæmileg, tilhæfulaus og smekklaus og til þess fallin að sverta stefnendur. Hagsmunir stefnenda af því að fá ummælin dæmd dauð og ómerk eru því miklir.”

,,Mennirnir byggja á því að konan hafi vegið með alvarlegum hætti að æru þeirra. Með því hafi hún framið ólögmæta meingerð gagnvart stefnendum sem hún beri skaðabótaábyrgð á enda um ærumeiðandi aðdróttanir að ræða sem bæði eru rangar og bornar út og birtar án sennilegrar ástæðu til að halda þær réttar. Það er ljóst að virðing þeirra hefur beðið hnekki, sem og æra þeirra og persóna. Réttur manna til æruverndar og friðhelgi einkalífs nýtur verndar stjórnarskrár mannréttindasáttmála Evrópu og almennra hegningarlaga.

Það sé hlutverk handhafa opinbers valds að rannsaka, ákæra og dæma menn fyrir refsiverða háttsemi, ekki almennings. Með ummælum sínum um mennina hafi konan haldið því fram að þeir hafi gerst sekir um alvarleg hegningarlagabrot sem enginn fótur er fyrir. Slagkraftur umfjöllunar um meint brot stefnenda sem stefnda tók þátt í að deila og bera út var slíkur að stefnendur óttuðust um líf sitt vegna múgæsingsins sem umfjöllunin skapaði og hrökkluðust úr landi þar sem þeir dvöldu meira og minna næstu árin.

Annar maðurinn missti vinnuna í kjölfarið og hinum var gert að hætta námi við Háskóla í Reykjavík. Hvorugur hefur átt afturkvæmt í fyrra starf/nám. Báðir stefnendur hafa glímt við langvarandi kvíða og þunglyndi vegna umfjöllunarinnar. Stefnda tók þátt í að dreifa nöfnum og myndum af stefnendum, sem deilt var mörg þúsund sinnum á samfélagsmiðlum þar sem stefndur voru úthrópaðir sem nauðgarar og þeim hótað líkamsmeiðingum og lífláti.

Konan tók sig jafnframt til og skrifaði um stefnendur á ensku sem gerði það að verkum að upplýsingar um þá náðu til enn fleiri en ella hefði verið. Mennirnir telja að miski hvors þeirra um sig vegna ummæla stefndu sé hæfilega metinn krónur 2.000.000. skv. skaðabótalögum enda sé um að ræða skýr og ótvíræð brot á réttarreglum, sem ætlað er að vernda æru og friðhelgi einkalífs stefnenda sbr. almenn hegningarlög.

Konunni hefur verið stefnt til þess að mæta á dómþingi Héraðsdóms Reykjavíkur, þriðjudaginn 30. október 2018, kl 10.00 og þá verður málið þingfest. Ef hún mæti ekki fyrir dóm við þingfestingu málsins, megi hún búast við því að dæmt verði í málinu að henni fjarstaddri.” Segir m.a. í stefnunni sem að birt var í Lögbirtingarblaðinu.

Skilgreiningar á heimilisofbeldi

Notkun á hugtökunum heimilisofbeldi og ofbeldi í nánum samböndum er nokkuð frjálsleg þar sem hvort tveggja er notað til skiptis í almennu tali og oft í víðu samhengi. Í þessari umfjöllun verður notast við orðið heimilisofbeldi. Ekki er munur á hugtökunum eins og þau eru skilgreind hér.

Um er að ræða ofbeldi sem einstaklingur verður fyrir af hálfu einhvers sem er honum nákominn, skyldur eða tengdur, eins og maki, barn, foreldri, barnsfaðir, systkini eða forráðamaður. „Maki“ getur verið núverandi eða fyrrverandi eiginmaður/eiginkona, kærasti/kærasta eða sambúðaraðili. Þolandi og gerandi þurfa hvorki að búa saman né vera gift til að ofbeldið flokkist sem heimilisofbeldi. Heimilisofbeldi þarf heldur ekki að vera bundið við heimili geranda eða þolanda.

Sérstaða heimilisofbeldis felst í því að gerandi og þolandi tengjast nánum böndum sem gerir ofbeldið enn sársaukafyllra en ella, auk þess að gera þolanda erfiðara um vik að slíta tengslum við ofbeldismanninn. Heimilisofbeldi er skilgreint sem kynbundið ofbeldi en það er þegar ofbeldi er beint gegn þolanda vegna kynferðis viðkomandi eða ofbeldi þar sem yfirgnæfandi meirihluti þolenda er af tilteknu kyni.

Ólík form og birtingarmyndir heimilisofbeldis
Heimilisofbeldi getur verið af margvíslegum toga og í hverju tilfelli er oft er um fleiri en eina tegund ofbeldis að ræða. Ofbeldið getur verið líkamlegt, andlegt, kynferðislegt, fjárhagslegt og stafrænt auk ýmis konar hegðunar sem felur í sér ógn, hótun, stjórnun og/eða þvinganir. Formi og aðdraganda ofbeldisins má oft lýsa sem ákveðnum ofbeldishring, þar sem spennan í sambandinu magnast upp, endar með einhvers konar sprengingu, svo fellur allt í dúnalogn („hveitibrauðsdagarnir“) og allt er frábært. Svo byrjar spennan aftur að byggjast upp og hringurinn rúllar.
Athugið að hér á eftir er einungis stiklað á stóru hvað varðar lýsingu, dæmi og afleiðingar ýmissa birtingarmynda ofbeldis. Samantektin er alls ekki tæmandi og er einungis til þess hugsuð að gefa hugmynd um tegundir ofbeldis og afleiðingar. Algengt er að form/birtingarmyndir ofbeldis skarist, til dæmis er líkamlegt ofbeldi einnig andlegt ofbeldi. Kynferðislegt ofbeldi er jafnframt líkamlegt í flestum tilfellum, en getur verið t.d. að þvinga fólk til að horfa á klám, að vera með kynferðislegar aðdróttanir eða að tala á óviðeigandi kynferðislegan máta.
Mikið fræðsluefni um heimilisofbeldi er aðgengilegt á netinu. Til dæmis eru til nokkrar rannsóknir á íslensku um heimilisofbeldi.

1. Líkamlegt ofbeldi
Líkamlegt ofbeldi er þegar líkamlegu afli er beitt gegn öðrum einstaklingi, hvort sem líkamlegur skaði hlýst af eða ekki. Líkamlegt ofbeldi er líka þegar haldið er aftur af líkamlegum þörfum viðkomandi. Algengt er að líkamlegu ofbeldi sé beitt í kjölfar andlegs ofbeldis sem hefur verið til staðar um tíma.
Dæmi um líkamlegt ofbeldi í nánu sambandi getur verið ef maki þinn:
Heldur þér í gíslingu.
Kemur í veg fyrir að þú nærir þig.
Kemur í veg fyrir að þú náir almennilegum svefni.
Skaðar þig með t.d. hnífi, belti, byssu eða barefli.
Kemur í veg fyrir að þú getir tekið nauðsynleg lyf.
Sparkar/kýlir í hluti, hendir og/eða skemmir hluti.
Kemur í veg fyrir að þú getir farið og/eða komið þegar þú vilt.
Slær, kýlir, lemur, klórar, bítur, skallar, klípur, sparkar í, rífur í hár, hrindir, brennir, drekkir, kæfir, eða tekur þig kverkataki.

Afleiðingar geta verið misjafnlega alvarlegar. Alvarlegasta afleiðing líkamlegs heimilisofbeldis er þegar annar aðilinn myrðir maka sinn.

2. Andlegt ofbeldi
Andlegt ofbeldi getur verið í formi orðaskipta eða í formi líkamstjáningar. Samskiptin einkennast oft af niðurlægingu og er yfirleitt leið annars aðilans að ná stjórn á eða völdum yfir makanum.
Dæmi um andlegt ofbeldi í nánu sambandi getur verið ef maki þinn:
Öskrar á þig.
Uppnefnir þig.
Gerir lítið úr þér.
Hótar og/eða ógnar þér.
Segir þig ruglaða/geðveika.
Kennir þér um hegðun sína og líðan.
Einangrar þig frá vinum og fjölskyldu.
Treystir þér ekki til að taka ákvarðanir.
Lætur þér líða eins og þú sért föst í sambandinu.
Treystir þér ekki í kringum aðila af hinu kyninu.
Fylgist með ferðum þínum – hefur eftirlit með þér.
Kemur að tilfinningu hjá þér um yfirvofandi ofbeldi.
Gagnrýnir þig og/eða gerir lítið úr afrekum þínum eða vinnu.
Lætur þér líða þannig að þú þurfir virkilega á honum að halda.
Er móðgandi/særandi þegar hann er undir áhrifum áfengis/fíkniefna.
Notar áfengi/fíkniefni sem afsökun til að segja móðgandi/særandi hluti.
Áreitir þig stanslaust t.d. með skilaboðum, símhringingum og/eða heimsóknum.
Ætlar að „láta þér eitthvað að kenningu verða“ með því að t.d. banna þér að leita aðstoðar eftir rifrildi.
Niðurlægir þig og gerir grín að þér, hvort sem er í fjölmenni, fyrir framan vini/fjölskyldu eða þegar þið eruð tvö.

Afleiðingar andlegs ofbeldis sitja oft lengur í þolandanum, miðað við afleiðingar líkamlegs ofbeldis. Andlegt ofbeldi skilur ekki eftir sig sjáanlega áverka og því getur verið erfiðara að koma auga á það og meðhöndla.

3. Kynferðislegt ofbeldi
Kynferðislegt ofbeldi getur verið í formi óumbeðinnar innsetningar (um leggöng, endaþarm og/eða munn), eða snertingar (strjúka, kyssa, sleikja, sjúga eða nota hluti) á einhverjum hluta líkamans. Ofbeldið getur birst sem:
Kynferðisleg árás; eins og að þvinga viðkomandi til að stunda með sér einhvers konar kynmök, hvort sem um er að ræða varin eða óvarin.
Kynferðislegt áreiti; getur verið bæði andlegt og líkamlegt áreiti af kynferðislegum toga.
Dæmi um kynferðislegt ofbeldi í nánu sambandi getur verið ef maki þinn:
Gerir þig út í vændi.
Krefst kynlífsathafna sem þú kýst ekki.
Lætur þig stunda kynlíf með (mörgum) öðrum.
Notar líkamlegt afl, vald, samvisku eða neyð þína til að eiga við þig kynmök.
Það telst kynferðislegt ofbeldi ef annar aðilinn ákveður að stunda kynmök með maka sínum ef makinn er drukkinn, undir áhrifum fíkniefna, sofandi, hræddur við að neita um þátttöku í kynlífi, of gamall, of ungur eða er háður þeim sem krefst kynmaka.

Afleiðingar geta komið fram strax en líka síðar, og geta verið líkamlegar, andlegar og/eða félagslegar. Konur sem búa við kynferðislegt ofbeldi eru útsettari fyrir að smitast af kynsjúkdómum, eru líklegri til að vera með vandamál tengd kynfærasvæði og í móðurlífi (s.s. sýkingar, erting, verkir) og eru líklegri til að verða ófrískar gegn sínum vilja en konur sem ekki búa við slíkt ofbeldi. Þolendur kynferðisofbeldis eru enn fremur líklegri til að vera með einkenni áfallastreitu röskunar, kvíða og þunglyndis. Jafnframt eru þolendur líklegri til að finna fyrir skömm, sektarkennd, reiði, ótta, einangrun og hafa lélegri sjálfsmynd en þeir sem ekki hafa verið beittir kynferðisofbeldi.

4. Fjárhagslegt ofbeldi
Fjárhagslegt ofbeldi er leið til að stjórna makanum í gegnum fjárhag.
Dæmi um fjárhagslegt ofbeldi í nánu sambandi getur verið ef maki þinn:
Bannar þér að vinna.
Tekur launin þín af þér.
Skammtar þér peninga.
Skráir skuldir á þig en eignir á sig.
Kemur í veg fyrir að þú veljir þér starfsframa.
Eyðileggur persónulega muni þína viljandi.
Heldur upplýsingum um stöðu fjármála frá þér.
Ráðstafar sameiginlegum fjármunum í óþarfa eins og áfengi/fíkniefni eða eigin áhugamál án þess að ráðfæra sig við þig.

Afleiðingar geta verið þær að þolandi einangrast, missir sjálfstæði sitt og finnst hann eigi erfitt með að yfirgefa geranda þar sem þolandi er orðinn fjárhagslega háður honum.

5. Stafrænt ofbeldi
Er þegar ofbeldi er beitt með notkun tækni, til dæmis senda skilaboð gegnum samfélagsmiðla, síma eða tölvupóst.
Dæmi um stafrænt ofbeldi í nánu sambandi getur verið ef maki þinn: Skráir sig inná samfélagsmiðla á þínu nafni.
Stýrir því hver má vera vinur þinn t.d. á facebook og hver ekki. Er með upplýsingar um staðsetningu þína, t.d. í gegnum símann.
Stýrir því hverja þú mátt tala við gegnum samfélagsmiðla eða í síma.
Sendir þér og þrýstir á þig að senda sér skilaboð af kynferðislegum toga.
Þrýstir á þig að senda sér nektar/kynlífsmyndir og/eða myndbönd af þér.
Skoðar símann þinn reglulega, skoðar myndir, skilaboð og símtalasögu.
Sendir þér nektar/kynlífs myndir og/eða myndbönd af sér, gegn þínum vilja.
Sendir stanslaust skilaboð gegnum síma/samfélagsmiðla og/eða hringir stanslaust.
Hótar að tala illa um þig eða bera út sögur í gegnum t.d. síma eða samskiptaforrit.
Heimtar að fá lykilorð þín til að geta skráð sig inná samfélagsmiðla eða bankareikninga.
Hótar að birta opinberlega nektar/kynlífsmyndir og/eða myndbönd af þér, eða senda til ættingja, vina eða vinnufélaga.

Afleiðingar geta verið margvíslegar, fyrir utan stöðugt yfirvofandi áreiti upplifa þolendur oft ótta, reiði, kvíði, þunglyndi, ógn og að þeir séu ekki við stjórnina í sínu eigin lífi. Rannsóknir sýna einnig að þolendum finnst þeir ekki eiga neitt einkalíf, eru líklegri til að einangra sig, skammast sín fyrir stöðuna, finnst hún vera sér að kenna og upplifa sig hjálparlausa, miðað við þá sem ekki búa við þessa tegund ofbeldis.
Þessi texti er fenginn frá Kvennaathvarfinu.  Hér er hægt að fara inn á heimsíðu Vonar og kynna sér betur þau úrræði sem að þar er bent á.

Tengt efni:

Heimilis- og kynferðisofbeldi – Rúm 70% gerenda kenna þolanda um ofbeldið

Nettröll fá fangelsisdóma

,,Í fyrradag féll dómur í Finnlandi, sem vakið hefur verulega athygli, bæði þar og annars staðar í Evrópu. Þar voru nettröll dæmd í fangelsi, í skilorðsbundið fangelsi og til sektar vegna eineltis og ofsókna gegn finnskri blaðakonu, sem starfar við finnsku fréttastofuna YLE.

Blaðakonan, Jessikka Aro, hóf árið 2014 að kynna sér, fjalla um og afhjúpa starfsemi rússneskra nettrölla og finnskra hjálparmanna þeirra við að dreifa margvíslegum óhróðri á samfélagsmiðlum, sem augljóslega átti að stuðla að sundurlyndi og óánægju í finnsku samfélagi.

Hún komst m.a. í samband við starfsmenn í eins konar nettrölla verksmiðju í Pétursborg, sem þar störfuðu við að skrifa lygafréttir og frásagnir, sem birtar voru á finnskum samfélagsmiðlum og vafalaust víðar um heim.

Viðbrögðin frá nettrölla verksmiðjunni voru snögg. Jessikka Aro var lögð í einelti og ofsótt hvar sem því var við komið. Heilsufarsupplýsingar um hana voru birtar opinberlega, myndir af henni voru “fótósjoppaðar”, illmægi var beint að henni og hún m.a. kölluð “Nató-njósnari”.Hún fór í frí til Tælands og þar voru teknar af henni myndir að dansa á skemmtistað og birtar með niðrandi ummælum. Hún fékk símhringingar, þar sem skothvellir heyrðust í bakgrunni. Og hún fékk textaskilaboð, sem áttu að vera frá föður hennar, sem dáið hafði tveimur áratugum áður.

Jessikka Aro lét þetta ekki á sig fá heldur hélt áfram starfi sínu við að afhjúpa þessa starfsemi. Svo kom að því að henni var nóg boðið og hún hóf málarekstur.

Ilja Janitskin, stofnandi hægri sinnaðrar vefsíðu, sem styður stjórnvöld í Kreml var í fyrradag dæmdur í 22 mánaða fangelsi fyrir ofsóknir á hendur blaðakonuni, Johan Backman, sem lýst er á vefsíðu þýzku fréttastofunnar Deutsche-Welle, sem málpípu Moskvu, fékk árs fangelsisdóms, skilorðsbundinn. Dómstóllinn sagði þann mann hafa hvatt aðra á netinu til að ofsækja blaðakonuna með þeim hætti að það hafi haft mikil áhrif á lífsgæði hennar. Kona, sem vinnur við vefsíðu Janitskin fékk þriggja mánaða skilorðsbundinn dóm. Þau voru jafnframt dæmd til að greiða Aro 136 þúsund evrur í miskabætur, sem ganga til hennar og tveggja annarra fórnarlamba þessarar starfsemi.

Árásargjörn stjórnvöld hafa komið sér upp nýjum baráttuaðferðum.”

Lýðræðið er í hættu vegna starfsemi nettrölla

Lífsreynsla finnsku blaðakonunnar Jessikku Aro, sem sagt er frá hér á síðunni, lýsir í hnotskurn þeim vanda, sem við er að etja í lýðræðisríkjum Vesturlanda vegna svonefndra “nettrölla” og starfsemi þeirra.

Það er starfsemi af þessu tagi, sem hefur leitt til þeirrar rannsóknar, sem nú stendur yfir í Bandaríkjunum á hugsanlegum afskiptum Rússa af forsetakosningunum í Bandaríkjunum fyrir tveimur árum.

Það er alveg ljóst að lýðræði vestrænna ríkja er hætta búin af undirróðri af þessu tagi. Ríki sem búa við alræði í einhverri mynd (þar á meðal Rússland) hafa fundið leið til þess að misnota tæknilegar framfarir í mannlegum samskiptum til þess að grafa undan því tjáningafrelsi og skoðanafrelsi, sem einkennir Vesturlönd.

Í gær lýstu bandarískar öryggismálastofnanir yfir áhyggjum vegna þess að stjórnvöld í Rússlandi, Kína og Íran, leitist við að hafa áhrif á úrslit þingkosninganna, sem fram fara vestan hafs snemma í nóvember. Þessar stofnanir segja, skv. fréttum vefsíðunnar The Hill, að þær hafi engar sannanir fyrir beinum tæknilegum afskiptum þessara ríkja af atkvæðagreiðslum  en hins vegar fari ekki á milli mála að yfir standi herferð við að dreifa röngum upplýsingum og áróðri erlendra ríkja.

Bandaríska dómsmálaráðuneytið hefur jafnframt ákært rússneska konu fyrir slíka starfsemi, sem sé ætlað að sá fræjum sundurlyndis meðal kjósenda í Bandaríkjunum.

Það er augljóst að lýðræðislegum stjórnarháttum er hætta búin af þessari starfsemi.” Segir Styrmir Gunnarsson, f.v. Ritstjóri Morgunblaðsins.

Lögreglan á Suðurlandi lýsir eftir þremur ungum stúlkum

Lögreglan á Suðurlandi lýsir eftir þeim Ísabellu Máney Grétarsdóttur, Andreu Ósk Waagfjörð og Hrafnhildi Malen Lýðsdóttur. Stúlkurnar eru allar á 16. ári og fóru frá heimilum sínum á Selfossi í gærkvöldi.

Þeir sem búa yfir upplýsingum um ferðir þeirra eða hvar þær halda til eru beðnir um að koma þeim upplýsingum til lögreglu í gegnum síma Neyðarlínu 112 eða með skilaboðum hér á fésbókarsíðu lögreglunnar.

Skammt V af Vestfjörðum er 974 mb lægð sem þokast A og grynnist, en 200 km SA af Jan Mayen er vaxandi 965 mb lægð á norðausturleið. Langt SSV í hafi er vaxandi 1034 mb hæð sem mjakast A á bóginn.

Hér er hægt að skoða lægðir í kringum landið

Veðurhorfur á landinu
Suðvestan 15-25 m/s, hvassast á Norðurlandi og hviður við fjöll þar 30-40 m/s. Þurrt austanlands, annars víða skúrir, en él til fjalla norðvestan- og norðantil. Dregur úr vindi á morgun, fyrst um landið vestanvert. Víða suðvestan 5-13 annað kvöld og skúrir eða slydduél á vesturhelmingi landsins. Hiti yfirleitt á bilinu 2 til 7 stig.

Höfuðborgarsvæðið
Suðvestan 13-20 m/s. (Gult ástand)
20 okt. kl. 21:00 – 21 okt. kl. 06:00
Hvassviðri 13-20 m/s. Varhugavert fyrir vegfarendur með aftanívagna eða á ökutækjum sem taka á sig mikinn vind. Einnig geta verið hvassir sviptivindar í efribyggðum og við háar byggingar. Fólk er hvatt til að sýna aðgát og ganga frá lausum munum til að forðast tjón.

Faxaflói
Suðvestan 15-23 m/s (Gult ástand)
20 okt. kl. 20:00 – 21 okt. kl. 06:00
Suðvestan hvassviðri eða stormur, 15-23 m/s. Varasamt fyrir ökutæki sem taka á sig mikinn vind. Fólk er hvatt til að sýna aðgát og ganga frá lausum munum til að forðast tjón.

Breiðafjörður
Suðvestan 15-23 m/s (Gult ástand)
20 okt. kl. 19:00 – 21 okt. kl. 08:00
Hvassviðri eða stormur, 15-23 m/s, hvassast norðantil. Varasamt fyrir ökutæki sem taka á sig mikinn vind. Fólk er hvatt til að sýna aðgát og ganga frá lausum munum til að forðast tjón.

Vestfirðir
Suðvestan 15-23 m/s (Gult ástand)
20 okt. kl. 14:00 – 21 okt. kl. 08:00
Suðvestan og vestan hvassviðri eða stormur, 15-23 m/s og skúrir, en útlit fyrir él á fjallavegum. Búast má við snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind og einnig erfið aksturskilyrði á fjallvegum sökum skafrennings og ofankomu. Fólk er hvatt til að sýna aðgát og ganga frá lausum munum.

Strandir og Norðurland vestra
Suðvestan 15-23 m/s (Gult ástand)
20 okt. kl. 17:00 – 21 okt. kl. 10:00
Suðvestan 15-23 m/s og súrir, en él á fjallvegum Búast má við mjög snörpum vindhviðum við fjöll, einkum í Skagafirð og á Ströndum. Hviðurnar geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind og einnig erfið aksturskilyrði á fjallvegum sökum skafrennings og ofankomu. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Norðurland eystra
Suðvestan 18-25 m/s (Gult ástand)
20 okt. kl. 14:00 – 21 okt. kl. 14:00
Hvassviðri eða stormur, 15-23 m/s en 18-25 í nótt, hvassast V-til. Skúrir, en él á fjallvegum. Búast má við mjög snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind og einnig erfið aksturskilyrði á fjallvegum sökum skafrennings og ofankomu. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Austurland að Glettingi
Vestlæg átt 15-23 m/s (Gult ástand)
20 okt. kl. 15:00 – 21 okt. kl. 19:00
Suðvestan átt 15-23 m/s, en norðvestalægari vindur annað kvöld. Lengst af þurrt, en skúrir síðdegis á morgun og él á sumum fjallvegum. Búast má við mjög snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind og einnig erfið aksturskilyrði á fjallvegum sökum skafrennings og ofankomu. Afmarkaðar samgöngutruflanir líklegar. Fólk er hvatt til að sýna aðgát og ganga frá lausum munum.

Austfirðir
Vestan 15-23 m/s (Gult ástand)
21 okt. kl. 15:00 – 19:00
Vestan 15-23 m/s síðdegis á morgun. Búast má við snörpum vindhviðum við fjöll, sem geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Fólk er hvatt til að sýna aðgát og ganga frá lausum munum.

Suðausturland
Suðvestan 15 -23 m/s (Gult ástand)
20 okt. kl. 14:00 – 21 okt. kl. 18:00
Suðvestan hvassviðri eða stormur, 15 -23 m/s með mjög snörpum vindhviðum við fjöll, einkum í grend við Mýrdals- og Öræfajökul. Hviður geta verið varhugaverðar fyrir vegfarendur með aftanívagna eða á ökutækjum sem taka á sig mikinn vind. Afmarkaðar samgöngutruflanir mögulegar. Fólk er hvatt til að sýna aðgát og ganga frá lausum munum.

Miðhálendið
Suðvestan 18-28 m/s (Gult ástand)
20 okt. kl. 20:00 – 21 okt. kl. 16:00
Suðvestan stormur 18-23 m/s en rok, 23-28 m/s norður af Vatnajökli seint í kvöld og nótt. Varhugavert ferðaveður og fólki er bent á að sýna varkárni.

Veðurhorfur á landinu næstu daga
Á mánudag:
Vestan 5-10 m/s og dálítil væta, en þurrt að kalla norðanlands. Hiti 1 til 8 stig, hlýjast syðst.

Á þriðjudag:
Fremur hæg breytileg átt, þurrt á landinu og hiti 0 til 5 stig. Gengur í suðaustan 8-13 með rigningu á Suður- og Vesturlandi seinnipartinn og hlýnar heldur.

Á miðvikudag:
Stíf suðvestanátt með skúrum, en bjart um landið austanvert. Hiti 3 til 8 stig.

Á fimmtudag:
Gengur í ákveðna norðanátt með snjókomu eða slyddu norðantil á landinu, en þurrt sunnanalnds. Hiti nálægt frostmarki.

Á föstudag og laugardag:
Norðlæg átt og él, einkum um landið norðanvert. Kalt í veðri.
Spá gerð: 20.10.2018 21:21. Gildir til: 27.10.2018 12:00.

Deilur hafa vaxið vegna orðaskipta innan netheima í lokuðum hópi á internetinu sem að kallar sig ,,Karlar gera merkilega hluti” þar sem að m.a. verk Jóns Steinars Gunnlaugssonar lögmanns hafa verið til umfjöllunar ofl. Jóni Steinari blöskraði umræðan og lét þá skoðun sína rækilega í ljós í fjölmiðlum í vikunni.

En ennþá halda deilur aðila að vaxa og borið hefur á póstum frá félögum þessa hóps nú í dag þar sem að verið er að tjá sig um málið. Þeirra á meðal er Hildur Lillendahl Viggósdóttir sem að birti neðangreinda færslu á vef sínum í dag:

,,Fyrir fimmtán mánuðum síðan varð vinkonu minni og samstarfskonu, Viktoría Júlía Laxdal, á sá heiftarlegi hatursglæpur að kalla Jón Steinar Gunnlaugsson krípí í lokuðum hópi á internetinu. Það var í kjölfar þess að hann lagði það til í viðtali við fjölmiðil að þolendur Roberts Downey fyrirgæfu bara kvalara sínum og héldu áfram með lífið, enda hefðu brotin hans nú ekkert verið það alvarleg og þær hefðu nú ekki verið nein smábörn.

Jón Steinar skrifaði grein í Morgunblaðið í fyrradag, fimmtán mánuðum síðar, þar sem hann nafngreindi vinkonu mína í föðurlegri hirtingu. Hetjur internetsins tóku svo við og nú er búið að birta mynd af henni á Facebook sem hefur, þegar þessi orð eru skrifuð, verið deilt tæplega 40 sinnum.

Í athugasemdum sem um hana hafa fallið er vitanlega rangt farið með nokkurn veginn allt, t.a.m. hvar hún vinnur, við hvað og hvað hún fær greitt fyrir það, en látum það liggja milli hluta.

Ofbeldið sem ríður yfir hana í dag er með því viðbjóðslegasta sem ég hef séð – og hafi það ekki verið á hreinu hef ég ýmsa fjöruna sopið í þeim bransa. Hún hatar karla. Hún er forhert og ofdekruð. Það á að reka hana úr vinnunni (sinnum hundrað). Hún er sérfræðingur í hatri gegn karlmönnum, illyrðum og rógi. Hún er orðljót með afbrigðum. Það er keytulykt af henni. Hún er ógæfulegur pilsvargur og hún er asni. Hún er brundfés og BITCH !! og afleiðing úrkynjunar og aumingjavæðingar.

Það er æðissvipur í augunum á henni og eini munurinn á augnaráði hennar og jórtrandi belju er gáfnaglampinn í augum beljunnar. Hún sýgur samborgara sína um lífsviðurværi um leið og hún spýr yfir þá óþverra. Hún er fasisti. Hún er gráðug og spillt og það á að fiðra þessa glyðru.

Það á að flæma þetta ógeð úr Ráðhúsinu og hún er ófullnægð og miðaldra. Hún er forréttindapía sem vinnur við að ata saklaust fólk aur. Hún hefur níð og mannorðsmorð á samviskunni. Hún er geðbilað drullupakk og viðbjóður. Hún er ógeð og kríp sem á að skammast sín og fara til andskotans.  Takk fyrir þetta, Jón Steinar. Vonandi líður þér betur.” Segir Hildur Lillendahl.

Inn á vefnum gamlar íslenskar ljósmyndir á facebook, getur fólk fengið að skoða gamlar myndir, sem eru 25 ára og eldri. Auðvelt er að gleyma sér yfir að skoða t.d. gamlar svart hvítar myndir sem að sýna lífið og tilveruna eins og hún var fyrir aldarfjórðungi og síðar. Margt hefur breyst.

Um er að ræða verðmæt söguleg verk frá ýmsum höfundum og á meðal þeirra er t.d. forsíðumynd dagsins, ,,Teikað í Reykjavík” send inn af Guðlaugi Viðari Valdimarssyni sem að sýnir krakka vera að teika. En á árum áður, var það ekki óalgengt að krakkar héngu aftan í bílum og létu þá draga sig langan veg í hálku. Þótti það hættulegt athæfi og mikið yfir því skammast af eldra fólkinu en þetta var á þeim tíma sem að börn léku sér úti alla daga og tölvur með tilheyrandi inniveru barna, var ekki til.

Hér að neðan má t.d. sjá mynd af bröggum, en braggar hafa verið mikið til umfjöllunar að undanförnu

Hægt er að sækja um að gerast aðili að síðunni en reglur meðlima eru eftirfarandi:

Reglur hópsins:

1) Hérna má setja inn gamlar ljósmyndir (25 ára eða eldri) og þá sérstaklega myndir sem hafa gildi fyrir sem flesta. Heimilt er að setja inn erlendar myndir, en áhersla hópsins er á íslenskar myndir.

2) Látið umsögn fylgja myndunum, ef upplýsingar eru til, svo sem nafn ljósmyndara, aldur ljósmynda, nöfn á fólki, sögufrægum húsum og þar fram eftir götunum, staðsetning ofl.

Íslendingar og Danir héldu sameiginlega leitar- og björgunaræfingu á Faxaflóa

Æfingin var allt í senn leitaræfing, samskiptaæfing og björgunaræfing þar sem reyndi á samvinnu Dana og Íslendinga við krefjandi aðstæður.

Samhliða æfingu Atlantshafsbandalagsins, Trident Juncture 2018, ákvað Landhelgisgæslan og danski heraflinn að efna til sameiginlegrar leitar- og björgunaræfingar á Faxaflóa í dag. Áhöfnin á TF-LIF tók þátt í aðgerðum á hafi fyrir hönd Landhelgisgæslunnar en Hvítabjörninn, varðskip Dana, og eftirlitsflugvél danska flughersins tóku sömuleiðis þátt í æfingunni. Stjórnstöð Landhelgisgæslunnar í Skógarhlíð hafði yfirstjórn með björgunaraðgerðum og sameiginleg björgunarmiðstöð Dana á Grænlandi tók einnig þátt.

Æfingin hófst með því að brúðu var varpað í hafið og í kjölfarið var það hlutverk þyrlunnar, eftirlitsflugvélarinnar og varðskipsins að finna hana og staðsetja. Þegar brúðan fannst flaug eftirlitsflugvél danska flughersins að staðnum og varpaði björgunarbáti í sjóinn. Áhafnarmeðlimir Hvítabjarnarins fóru þá um borð í björgunarbátinn og biðu björgunar. Þyrla Landhelgisgæslunnar kom þá á vettvang og bjargaði mönnunum og brúðunni. Að því búnu var þeim sem bjargað var komið fyrir um borð í Hvítabirninum þar sem þeim var veitt aðstoð. Að æfingu lokinni var eldsneyti dælt á TF-LIF úr danska varðskipinu.

Æfingin í dag var allt í senn leitaræfing, samskiptaæfing og björgunaræfing þar sem reyndi á samvinnu Dana og Íslendinga við krefjandi aðstæður.
Landhelgisgæslan og danski sjóherinn hafa á síðustu árum átt náið samstarf á ýmsum sviðum, þar á meðal við þjálfun áhafna.
Nauðsynlegt er að halda leitar- og björgunaræfingar sem þessar, þegar tækifæri gefast, í þeim tilgangi að samhæfa viðbrögð við slysum og óhöppum á hafi úti. Æfingin í dag þótti heppnast ákaflega vel en allir aðilar drógu mikinn lærdóm af henni. Æfingin sýndi glögglega hve mikilvægt er fyrir Íslendinga og Dani að vinna saman á Norður Atlantshafi.
Í áhöfn TF-LIF voru þeir Sigurður Ásgeirsson, flugstjóri, Tryggi Steinn Helgason, flugmaður, Óskar Óskarsson, flugvirki og Jóhann Eyfeld, stýrimaður. Snorre Greil og varðstjórar stjórnstöðvar stýrðu aðgerðum fyrir hönd Landhelgisgæslunnar í Skógarhlíð.

400 km suður af Svalbarða er víðáttumikil 960 mb lægð sem hreyfist lítið, en grynnist smám saman. Á sunnanverðu Grænlandssundi er 992 mb smálægð sem þokast austur, en 1.500 km suður af landinu er nærri kyrrstæð 1045 mb hæð.

Hér er hægt að skoða stöðuna á veðurkorti í beinni útsendingu

Veðurhorfur á landinu
Vestlæg átt 5-10 m/s og víða skúrir eða slydduél, en rofar til austast í kvöld. Vestan 8-15 og þykknar víða upp í nótt.  Vestan 5-13 á morgun, hvassast við suðurströndina og rigning eða slydda með köflum. Dregur úr úrkomu með deginum, yfirleitt þurrt annað kvöld. Hiti 1 til 8 stig, hlýjast syðst.

Veðurhorfur á höfuðborgarsvæðinu
Suðvestan 8-13 og skúrir en samfelldari rigning um tíma seint í nótt. Vestan 5-10 um hádegi á morgun og þurrt annað kvöld. Hiti 4 til 8 stig.

Veðurhorfur á landinu næstu daga
Á þriðjudag:
Fremur hæg austlæg eða breytileg átt, dálítil rigning eða slydda og hiti 1 til 5 stig. Þurrt norðantil á landinu með hita nálægt frostmarki. Bætir í vind og úrkomu sunnan- og vestanlands um kvöldið.

Á miðvikudag:
Suðvestan 13-18 m/s og rigning eða slydda, en norðaustlægari og snjókoma á Vestfjörðum. Snýst í norðan 8-13 seinnipartinn með slyddu eða snjókomu á norðanverðu landinu, en þurrt sunnanlands. Kólnandi veður, hiti víða nálægt frostmarki um kvöldið.

Á fimmtudag:
Norðan 8-15 m/s og él, en bjartviðri sunnantil á landinu. Hiti kringum frostmark.

Á föstudag:
Norðan 8-13, en 13-18 austanlands. Léttskýjað sunnan- og vestantil, en él um landið norðaustanvert. Frost 0 til 5 stig.

Á laugardag:
Fremur hæg breytileg átt og víða bjart veður, en dálítil él á norðausturhorninu framan af degi. Áfram kalt í veðri.

Á sunnudag:
Útlit fyrir vaxandi sunnanátt og þykknar upp með rigningu eða slyddu sunnan- og vestanlands og hlýnar. Hægari vindur norðaustantil með björtu og köldu veðri.

Umferðarslys, einn fluttur á sjúkrahús

Umferðarslys varð á gatnamótum Þorlákshafnarvegar og Þrenglsavegar.

,,Þarna varð árekstur tveggja bifreiða með þeim afleiðingum að einn var fluttur með sjúkrabifreið á slysadeild í Fossvogi. Þrír aðrir hlutu einhver meiðsl.  Unnið er á vettvangi og eru vegfarendur beðnir að taka tillit til þess. Umferð er hleypt fram hjá vettvangi eins og hægt er.” Segir lögreglan á Suðurlandi

Holir menn

Sólveig Anna Jónsdóttir, formaður Eflingar segir knúna til að bregðast við leiðara Fréttablaðsins s.l. föstudag vegna ummæla sem að þar eru viðhöfð um yfirvofandi kjarabaráttu sem að nú er framundan hjá stærstu launþegahreyfingum á Íslandi.

Rannsókn vegna andláts ungrar konu

Lögreglan á Norðurlandi eystra er með til rannsóknar andlát ungrar konu sem fannst látin á heimili sínu, í íbúð í fjölbýlishúsi á Akureyri í gærmorgun, 21. október.

Rannsóknin beinist að því að upplýsa um hvenær og hvernig andlátið átti sér stað. Dánarorsök liggur ekki fyrir.

Einn maður var handtekinn vegna málsins og var hann í dag úrskurðaður í gæsluvarðhald til föstudagsins 26. október n.k. Sá maður er talinn hafa verið á vettvangi þegar konan lést.

Lögreglan á Norðurlandi eystra getur ekki gefið frekari upplýsingar um málavexti meðan fyrstu aðgerðir rannsóknarinnar standa enn yfir.