Kvikmyndin Englar alheimsins í leikstjórn Friðriks Þórs Friðrikssonar er best sótta íslenska leikna kvikmyndin í fullri lengd en hana sóttu ríflega 83.000 manns árið 2000. Þetta kemur fram í frétt Hagstofunnar um tíu aðsóknarmestu leiknu íslensku kvikmyndirnar á árunum 1996-2013.
Friðrik Þór á aðra mynd á listanum, Djöflaeyjuna, en Baltasar Kormákur á fjórar myndir á listanum, Mýrina, Hafið, Brúðgumann og Djúpið. Engin kvikmynd í leikstjórn konu er á listanum yfir best sóttu kvikmyndirnar en aðsóknarmesta kvikmynd í leikstjórn konu er Stella í framboði í leikstjórn Guðnýjar Halldórsdóttur, sem er tólfta myndin á listanum, með hátt í 35.000 gesti.
Athygli vekur að níu myndanna eru byggðar á vinsælli skáldsögu, leikverki eða sjónvarpsfígúru en engin þeirra tíu mynda sem minnsta aðsókn hlutu er byggð á bókmenntaverki eða hefur beina skírskotun í alkunnan atburð.
Um helmingur þeirra 87 íslensku leiknu kvikmynda í fullri lengd sem frumsýndar voru á árunum 1996-2013 fékk innan við 10.000 sýningargesti en gestafjöldi á hverja frumsýnda mynd á árunum 1996-2013 var að meðaltali 17.373. Hins vegar var aðsókn að helmingi myndanna innan við 10.773 gestir. Átta myndir fengu yfir 50.000 gesti, tvær myndir yfir 80.000 áhorfendur, en sú mynd sem minnsta aðsókn hlaut fékk innan við 50 áhorfendur.
The post Baltasar Kormákur á fjórar af tíu best sóttu kvikmyndunum appeared first on FRÉTTATÍMINN.