Eins og fram hefur komið hefur fyrirtækið Prima ehf gert tilboð í skólabyggingu í Úlfarsárdal sem Ámundi V. Brynjólfsson, skrifstofustjóri framkvæmda- og viðhaldssviðs Reykjavíkur, telur svo lágt að það myndi kalla á sérstaka skoðun. Formgalli var hinsvegar á útboðinu og því hefur borgin kallað eftir tilboðum á ný. Prima ehf tengist Brotafli með margvíslegum hætti og yfirtók verkefni Brotafls þegar starfsemi þess var stöðvuð. Brotafl sætir rannsókn vegna gruns um umfangsmikil skattaundanskot.
Aðspurður um hvort lág tilboð Prima ehf veki eftirtekt, segist Sigurður Jensson hjá Ríkisskattstjóra ekki geta tjáð sig um einstök mál. „En það er þekkt að menn eru með undirboð í verktakastarfsemi á grundvelli fyrirfram ákveðinna vanskila á tryggingagjaldi, virðisaukaskatti og staðgreiðslu. Með því geta þeir gert óeðlilega lág tilboð og náð út úr verkefninu hagnaði á kostnað hins opinbera og eftir atvikum lífeyrissjóða.“ Hann segir háttsemina einkenna fyrirtæki sem einnig stundi kennitölumisnotkun. „Það er vinnuregla hjá okkur að fylgjast vel með þeim fyrirtækjum sem byggja á grunni fyrirtækja þar sem rekstur hefur verið stöðvaður.“
–Hver er ábyrgð verkkaupa í slíkum málum?
„Þó skatturinn fylgist með þessu þá dugir það ekki eitt og sér. Þeir sem stjórna fjármagnsflæðinu þurfa að vanda valið á undirverktökum. Það getur ekki talist gott viðskiptasiðferði að eiga viðskipti við fyrirtæki sem skilar ekki sköttum og skyldum af umsvifum sem það stendur í,“ segir Sigurður.
Bryndís Kristjánsdóttir skattrannsóknarstjóri segir ástæðu til að skoða keðjuábyrgð verktaka af fullri alvöru og telur hana brynju fyrir mörg þessara vandamála. „Við höfum lagt til að tekin verði upp keðjuábyrgð verktaka svo aðalverktakinn beri ábyrgð á undirverktökum sínum. Margar þjóðir í kringum okkur hafa gert það og telja það hafa skilað árangri. Finnar hafa verið mjög afgerandi í þessu. Ég tel rétt að sé skoðað af fullri alvöru hvort ekki sé ástæða til að taka upp þetta fyrirkomulag.”
–Hversvegna er ástæða til þess?
„Því við sjáum fleiri og alvarlegri mál sem væri hægt að koma í veg fyrir með slíkri leið. Menn eru með skýrari ásetning til brota en við höfum séð áður. Ásetning um skattalagabrot, þar sem menn rúlla ábyrgðinni niður eftir keðjunni og skilja hana þar eftir. Það er sérstakt við þessi brot hve háar fjárhæðir er um að ræða.“
„Það er fylgifiskur þessara skattaundanskotmála í verktakabransanum að þessir aðilar verðleggi sig niður, því þeir standa öðruvísi að vígi en þeir sem borga full gjöld. Hættan er að þetta drepi af sér annars lögmæta starfsemi því skattalagabrot skekkja samkeppnisstöðuna verulega,“ segir Ólafur Þór Hauksson héraðssaksóknari.