„Ég tel að þau risavöxnu álitaefni sem við stöndum frammi fyrir, kalli á breiða stjórn frá hægri til vinstri og ég hef efasemdir um að fjölflokka stjórn með mörgu nýju fólki muni valda verkefni sínu. Það þarf þó að mynda starfhæfa stjórn og sú skylda hvílir á flokkunum. Svo eigum við ekki bara að sjá hvað framtíðin ber í skauti sér.“
Sigurður Ingi hitti Katrínu Jakobsdóttur eins og aðrir leiðtogar stjórnmálaflokkanna og sagði fund þeirra hafa verið afar ánægjulegan. Hann dregur þó engan dul á áhuga sinn á því að starfa með VG, en sér þá frekar fyrir sér samstarf VG og fráfarandi stjórnarflokka. Margir Í VG telja þátttöku Framsóknarflokksins geta styrkt ríkisstjórnina. Þær raddir koma þó einkum úr íhaldssamari armi flokksins sem óttast að sérstaða VG verði fyrir borð borinn í Evrópumálunum. „Við erum sammála um margt, til að mynda í Evrópumálunum,“ segir Sigurður Ingi. „Við teljum ekki að málið eigi að vera á dagskrá núna, ekki síst með tilliti til þess að það standa yfir miklar breytingar í ESB og helsta viðskiptaland Íslands er á leið þaðan út.“
Sigurður Ingi segir enga sérstaka gjá milli flokkanna í sjávarútvegsmálum. „Á síðasta kjörtímabili vann ég frumvarp sem var unnið upp úr sáttaferli á kjörtímabilinu.“ VG hefur haft talsvert aðrar áherslur en hinir flokkarnir en þó þannig að arðurinn af auðlindinni eigi að skila sér til þjóðarinnar. Ekki er útilokað að bjóða upp hluta aflaheimildanna en leggja skal áherslu á hærri veiðigjöld. Ljóst er að landsbyggðararmur VG og Framsókn gætu hugsanlega átt samleið ef Framsókn felst á að stórhækka veiðigjöldin.
En eruð þið þá til í að stórhækka veiðigjöld? „Það er enginn að tala um að stórhækka veiðigjöld. það er ekkert í umræðunni. Það er stundum munur á frambjóðendum og forsetum, eins og við þekkjum frá Bandaríkjunum. Menn tala af meiri varfærni um að kollsteypa samfélaginu núna en þeir gerðu fyrir kosningar. Við útilokum ekki að skoða málið heildstætt en það eru 650 útgerðarfyrirtæki í landinu og það er ekki hægt að leggja meiri byrðar á minni fyrirtækin. En kannski er byrðunum ójafnt skipt nú þegar.“
Sigurður segir að heilbrigðismál hafi borið á góma en þar hafi hann fullvissað Katrínu um að flokkurinn ætli ekki að tefja nýjan Landsspítala. „Við lögðum til fyrir kosningar að skipa hóp sérfræðinga til að fara ofan í saumana á því hvort finna mætti nýjan stað undir spítala en þó aðeins að það tefði ekki framkvæmdina.“
Þá eru ótalin umhverfismálin þar sem flokkarnir hafa verið algerlega á öndverðum meiði. Sigmundur Davíð Gunnlaugsson er áfram áhrifamaður í Framsóknarflokknum sem oddviti í Norðausturkjördæmi þótt staða hans sé stórlega löskuð. Það getur haft áhrif á hversu stjórntækur flokkurinn er enda talast Sigmundur Davíð og Sigurður Ingi varla við? Helsti hvati kosninganna var líka birting Panama-gagnanna þar sem Sigmundur lék lykilhlutverk. Það er því athyglisvert ef Sigmundur myndi sitja sem ráðherra í næstu ríkisstjórn. Gæti sú staða komið upp? „Framsóknarflokkurinn er alveg fyllilega stjórntækur, við erum með átta þingmenn,” segir Sigurður Ingi. Hann segir heldur ekki allskostar rétt að þeir Sigmundur talist ekki við. Hann segir að ekkert liggi fyrir um hvort hann áðherraefni fari flokkurinn í ríkisstjórn. „Það hefur ekkert komið til tals.“ En kemur það til greina? „Það verður bara að koma í ljós og meira ætla ég ekki að segja um það.“