Fjárlaganefnd Alþingis telur að ekki liggi nægilega vel fyrir á hvaða forsendum sjávarútvegs-og landbúnaðarráðuneyti Gunnars Braga Sveinssonar ætlar að veita 100 milljónum króna til markaðssetningar á íslensku lambakjöti erlendis. Á miðvikudaginn óskaði nefndin eftir minnisblaði frá ráðuneyti Gunnar Braga um málið. Þetta segir Bjarkey Olsen Gunnarsdóttir, meðlimur í fjárlaganefnd og þingkona Vinstri grænna.
Bjarkey segir að skoðun nefndarinnar sé að ekki sé nægilega útskýrt í texta frumvarps til fjáraukalaga fyrir 2017, sem kynnt voru í síðustu viku, af hverju þetta er ákveðið. Eins og komið hefur fram er ástæðan fyrir styrkveitingunni sú að Norðmenn hættu við að kaupa 600 tonn af lambakjöti auk þess sem Rússlandsmarkaður lokaðist vegna viðskiptabanns Rússlands á vörur frá Íslandi vegna þátttöku landsins í efnahagsþvingunum gegn Rússum. „Fólk hefur skiptar skoðanir á því að þessi texti sé ekki að segja það sem málið raunverulega snýst um. Bæði þeir sem eru ósammála því að þessir peningar verði notaðir í þetta og eins þeir sem eru sammála því vilja fá frekari útskýringar á þessu. Þess vegna var farin sú leið að óska eftir minnisblaði frá ráðuneytinu,“ segir Bjarkey.
Málið vakti talsverða athygli í síðustu viku en í því felst í raun að íslenska ríkið bætir lambakjötsframleiðendum upp þær búsifjar sem þeir hafa orðið fyrir vegna ákvarðana Norðmanna og Rússlands.