Þóra Tómasdóttir
thora@frettatiminn.is
„Þetta var blankasti janúar frá upphafi mælinga,“ segi Auður Alfífa Ketilsdóttir sem birti skemmtilega mynd og gleðifregnir á Instagram. „Ég átti ekki krónu þar til í síðustu viku að ég vann óvænt 30 þúsund krónur í Happdrætti Háskólans. Það var frábært, en allur peningurinn fór í að vera manneskja; kaupa nauðsynjar í Bónus og endurnýja ökuskírteinið. Í gær hringdi svo kona frá Krabbameinsfélaginu því ég hafði farið í blóðprufu og tekið þátt í einhverri rannsókn í desember. Konan þurfti að rifja það upp fyrir mér að fyrir vikið hafi ég fengið að vera með í happdrætti. Hún hringdi til að tilkynna mér að ég hefði unnið 100 þúsund krónur!“
Auður Alfífa ákvað að úr því hún hefði óvænt eignast peninga þá skyldi hún frekar kaupa sér allt sem hana langaði í, en að borga reikninga. Djásnið sem sést á myndinni keypti hún á einum degi. „Ég vinn sem leiðsögumaður og mig vantaði jöklaskó, svo þeir urðu fyrst fyrir valinu. Ég keypti mér árskort í Bíó Paradís, því ég átti einu sinni svoleiðis og það var besta fjárfesting sem ég hef gert. Svo gat ég réttlætt að kaupa mér SMEG hraðsuðuketil því sá sem ég átti var mjög ljótur. Þessi er bleikur og nú vil ég hafa allt bleikt. Blómið passaði inn í litaþemað hjá mér og svo ætlaði ég að kaupa mér kampavínsglös en þau voru uppseld. Að lokum skráði ég mig á dansnámkeið hjá Brynju Péturs, eitthvert hip hop streetdansrugl.“