Sigurður Ragnar Eyjólfsson er þjálfari eins ríkasta kvennaknattspyrnuliðs í heimi, Jiangsu Suning í Kína, og hefur boðið íslenskum landsliðskonum atvinnumannasamninga við liðið. Í Fréttatímanum í gær gagnrýndi hann Frey Alexandersson fyrir að tala niður kínversku deildina og fyrir að segja að það hefði áhrif á val sitt í landsliðið ef leikmenn kysu að spila í Kína. Sigurður Ragnar sakaði Frey um fordóma fyrir kínverskum fótbolta en sendi frá sér yfirlýsingu í kjölfarið og sagðist hafa hlaupið á sig. Hann bað Frey afsökunar á þessu orðalagi.
„Ég upplifði orð hans á dapurlegan hátt. Hann hefur reyndar beðist afsökunar á gildishlöðnum orðum eins og að ég sé með fordóma. Slíkt á ekki við í umræðu um kvennalandsliðið. Hann má hafa sína skoðun á styrkleika kínversku deildarinnar en við erum bara ekki sammála þar.“
–Telur þú kínversku ofurdeildina vera óheppilegan stað fyrir landsliðskonur í fremstu röð? „Það mun reyna á það í framtíðinni, því þetta er nýfarið af stað og er enn á tilraunastigi. Mjög fáir evrópskir leikmenn hafa spilað þarna og styrkleikinn er óljós. Upphæðirnar sem um ræðir í kínverska kvennaboltanum eru ekki nálægt upphæðunum sem um ræðir í karlaboltanum þar.“
–Þú sagðir það myndi hafa áhrif á val þitt í landsliðið, ef leikmenn kysu að spila í Kína. Hvaða áhrif? „Samtöl okkar leikmannanna um Kína, snerust um framkvæmdina. Við höfum yfirleitt þrjá daga til að undirbúa hvern landsleik og það er stuttur tími fyrir þann sem þarf að ferðast lengi og snúa sólarhringnum við. Það þýðir ekki að leikmaðurinn geti ekki spilað fyrir landsliðið, en hann gæti orðið undir í samkeppni. Auk þess voru leikmennirnir búnir að gera upp hug sinn um tilboð frá Kína, áður en þær töluðu við mig.“