„Erlend fyrirtæki eru að flytja inn bæði rútur og bílstjóra og leigja fyrirtækjum fyrir smápeninga. Eftirlitið er ekki nógu öflugt og þótt við höfum bent bæði ríkisskattstjóra og Vinnumálastofnun á þetta, virðist lítið gerast í málinu,” segir Gunnar Valur. “Önnur fyrirtæki geta ekki keppt við þetta hræódýrara vinnuafl og þeir sleppa líka við skattgreiðslur. Við vissum um 5 til 10 rútur í fyrra og búumst frekar við að þeim fjölgi í sumar ef ekkert gerist.“
„Við höfum fengið að vita að þeir greiði bílstjóranum pólsk laun, um 5000 krónur fyrir daginn, þeir sofa á gistiheimilum með ferðamönnum í lengri ferðum, annars bara í bílnum,“ segir Haraldur Þór Teitsson framkvæmdastjóri rútufyrirtækisins Teits Jónassonar.
„Við höfum orðið varir við þessi fyrirtæki og að þessi þjónusta standi til boða. Auðvitað er þetta mikið áhyggjuefni ef menn ætla að ryðjast inn á markaðinn í stórum stil. Eftirlitið virðist vera nánast ekki neitt,“ segir Sveinn Matthíasson flotastjóri Kynnisferða.
„Það er náttúrulega bara skelfing, þessir menn kunna ekki á íslenskt veðurfar og aðstæður. Ég hef heyrt að þetta sé að færast í vöxt og við verðum auðvitað vör við að það koma oft erlendir rútubílar til landsins og bílstjórarnir eru oft í vandræðum þegar veðrið breytist. Menn eru að leika á kerfið, það er enginn vafi,“ segir Hlífar Þorsteinsson hjá Austfjarðaleið.
Haraldur segist hafa fengið tilboð um að leigja slíkar rútur með bílstjóra en ávallt hafnað því. Það sé hinsvegar ótti hjá bílstjórum um að þetta ógni starfsöryggi þeirra enda eru pólsku bílstjórarnir að fá brot af launum hinna: „Þeir hafa af þessu þungar áhyggur, að pólskir starfsbræður þeirra fái störfin fyrir miklu minni pening,“ segir hann. „Þetta er auðvitað mjög freistandi fyrir fyrirtæki í þessum rekstri. Þarna eru háar fjárhæðir í húfi.“
Hann segist hafa rætt þessi mál, bæði við Eflingu og ASÍ. „Ég hef ekki orðið var við mikinn áhuga, ef ég á að vera alveg hreinskilinn. Ég sé satt að segja ekki muninn á þessu og því sem Samskip í Hollandi eru kærðir fyrir. Ég hef ekki orðið var við að þessi fyrirtæki hafi nokkurn tímann fengið tiltal nema ef þau aka ekki samkvæmt ökurita.“
