Borg brugghúsi var á dögunum boðið að taka þátt í mikilli bjórhátíð í London. Hátíðin var haldin á nokkrum börum þar í borg á vegum The Craft Beer Co. og fóru Borgar-menn með tólf tegundir af bjór sínum sem kynntir voru á hátíðinni og eru nú til sölu á þessum börum.
Fréttatíminn fylgdist með hátíðinni eins og kom fram í blaðinu í síðustu viku. Íslensku bjórararnir vöktu mikla lukku og búast má við því að hátíðin skili frekari útbreiðslu Borgar-bjóra á næstunni.
En London-ferðin var ekki bara til þess að semja um dreifingu á Borgar-bjórunum heldur voru bruggararnir líka að stofna til viðskiptasambanda við erlenda kollega sína, rétt eins og kom fram í máli Árna Long, bruggmeistara Borgar, í blaðinu í síðustu viku. Og ekki vantaði áhugaverð brugghús sem Borg deildi sviðinu með. Á sama bar og íslensku bjórararnir voru kynntir voru önnur skandinavísk brugghús að kynna sína bjóra. Af þeim má nefna sænska brugghúsið Dugges sem kynnti flotta súrbjóra – rabarbara-, kirsuberja- og ástaraldins-súrbjór. Eins var 7 Fjell frá Bergen í Noregi afar athyglisvert. Á öðrum stað voru nokkur bandarísk brugghús, til að mynda Funky Buddha, Cigar City og Other Half.
„Þetta voru allt mjög frambærileg brugghús,“ segir Árni um kollega sína. Forsvarsmenn Borgar hafa staðfest að von sé á erlendum bruggurum hingað til lands á næstunni til að brugga með Árna og Valgeiri í Borg en ekki hefur fengið staðfest um hvaða brugghús er að ræða. Freyr Rúnarsson, bjórstjóri á Skúla, staðfestir hins vegar að tvö brugghús komi hingað á næstunni, en Freyr sótti hátíðina í London.
„Þeir í 7 Fjell ætla að koma í desember og við gerum eitthvað jólalegt með þeim. Svo eftir áramót á ég von á því að Other Half komi hingað. Það var fimmta besta nýja brugghús í heimi árið 2014, samkvæmt Ratebeer. Þeir hafa sýnt því mikinn áhuga að koma hingað.“
The post Íslenskir bruggarar í góðum félagsskap appeared first on Fréttatíminn.