Elín Edda vinnur að annarri teiknimyndasögubók sinni en hún rekur myndasöguútgáfu ásamt systur sinni. Sagan hennar um Gombra hefur verið í smíðum í tvö ár.
Elín Edda hefur teiknað frá því hún var pínulítil. „Eftir að ég fór í Myndlistarskólann, þrettán ára, ákvað ég að þetta væri það sem ég þyrfti að einbeita mér að. Þar lærði ég að teikna betur og fékk hvatningu til að leggja þetta fyrir mig.“
Nú stundar hún nám í grafískri hönnun við Listaháskólann og vinnur hörðum höndum að því að koma annarri myndasögubók sinni út. Fyrirhugað er að sagan, Gombri, komi út í vor, 1. apríl, samhliða sýningu hennar í gallerí Ekkisens.
„Gombri býr í Garði og er einmana og leiður. Ættingjar hans eru dánir svo hann ákveður að yfirgefa heimili sitt og ráðast í ferðalag. Á leiðinni hittir hann Nönnu sem er líka á flótta undan einhverju en hún man ekki alveg hvað það var. Saman ferðast þau til borgarinnar og sagan fjallar um það sem fólki finnst vera satt og mikilvægt að trúa á.“
Teikningar hafa heillað Elínu Eddu frá því hún var barn. „Ég fór mikið á listasöfn með foreldrum mínum og flestir í kringum mig voru að teikna. Afi var sérstök fyrirmynd mín í teikningu. Hann var áhugalistamaður og alltaf að teikna og smíða einhver flott listaverk.“
Elín Edda segir Elísabetu Rún, systur sína, hafa kynnt sig fyrir myndasögum. „Ég hafði bara lesið Andrés önd sem krakki og líklega höfðu teiknimyndirnar í barnatímanum mikil áhrif á mig. Nú er ég að kynnast stærri myndasöguverkum og hef áhuga á að gera fleiri sögur sjálf.“
Systurnar unnu saman myndasöguna Plantan á ganginum sem kom út árið 2012. Þær lögðu mikla vinnu í bókina og Elín Edda varði öllum tíma með menntaskóla í að koma henni heim og saman. Sagan fjallar um Geirþrúði sem kýs blóm og plöntur fram yfir fólk. Hún hefur einangrað sig frá umheiminum en líf hennar breytist þegar hún setur sérstaka plöntu á ganginn í húsinu sínu. Fyrst kom sagan út á vefnum en síðar stofnuðu systurnar útgáfuna Nóvember sem gaf söguna út í bókarformi.
Elín Edda leitar að fjármagni til að geta komið bókinni um Gombra út.
Sjá nánar á facebooksíðu sögunnar facebook.com/gombraelinedda
The post Teiknar undir áhrifum frá afa appeared first on Fréttatíminn.