„Við héldum að þetta væri allt í góðu enda var engin nekt í þessari auglýsingu. En þetta fór fyrir brjóstið á einhverjum,“ segir Sigurður Anton Friðþjófsson, leikstjóri kvikmyndarinnar Webcam, sem frumsýnd verður í næstu viku.
Auglýsingar fyrir Webcam voru sýndar á Stöð 2 í vikunni og hneyksluðu greinilega einhverja áhorfendur. Sigurður segir að fólk hafi hringt inn til stöðvarinnar og kvartað. Brugðist var við kvörtunum. „Já, henni var breytt. Við gerðum mýkri útgáfu. Vonandi verður hún nógu mjúk,“ segir hann.
Webcam verður frumsýnd í Senubíóunum á miðvikudaginn í næstu viku. Myndin fjallar um framhaldsskólastelpuna Rósalind sem eyðir sínum tíma að mestu í að djamma, flakka milli stráka og hanga með bestu vinkonu sinni. Allt þetta breytist eftir að hún kynnist strák með gægjuhneigð en þau kynni verða smám saman til þess að Rósalind finnur köllun sína í að fækka fötum fyrir framan vefmyndavél í beinni útsendingu á netinu.
Myndin var tekin upp á sextán dögum um síðustu jól og áramót og er sjálfstæð framleiðsla. Með aðalhlutverk fara Anna Hafþórsdóttir, Telma Huld Jóhannesdóttir, Júlí Heiðar Halldórsson og Ævar Már Ágústsson.
Hér má lesa nánar um myndina.
The post Kvartað undan auglýsingu fyrir íslenska kvikmynd appeared first on FRÉTTATÍMINN.