Þær Birna Anna Björnsdóttir, Lára Björg Björnsdóttir og Silja Hauksdóttir hafa stofnað fyrirtækið Suðvestur ehf. sem veitir ráðgjöf til fyrirtækja, stofnana og einstaklinga og sér um skipulagningu og framkvæmd viðburða. Auk þeirra þriggja hefur Suðvestur á sínum snærum breiðan hóp sérfræðinga á sviði viðburðastjórnunar, almannatengsla, fyrirtækjaráðgjafar, kvikmyndaframleiðslu, hönnunar, leikstjórnar, leikmyndagerðar og ritstarfa, að því er segir í tilkynningu frá þeim stöllum.
Birna Anna Björnsdóttir var blaðamaður á Morgunblaðinu frá 1998-2008 og skrifaði fyrir flestallar deildir blaðsins á þeim tíma. Hún hélt að auki úti dálki undir eigin nafni um árabil í sunnudagsútgáfu blaðins. Birna Anna skrifaði skáldsöguna Dís sem gefin var út af Forlaginu og handrit samnefndrar kvikmyndar í félagi við Silju Hauksdóttur og Oddnýju Sturludóttur. Hún skrifaði einnig skáldsöguna Klisjukenndir sem gefin af út af Máli og menningu og vinnur nú að sinni þriðju skáldsögu. Birna Anna er með BA gráðu í heimspeki frá Háskóla Íslands og MA gráðu í bókmenntafræði frá New York University.
Lára Björg Björnsdóttir hefur starfað við almanntengsl og skipulagningu viðburða auk þess að hafa reynslu af blaðamennsku og fréttaskrifum, meðal annars fyrir Fréttablaðið, Viðskiptablaðið og Nýtt Líf. Lára Björg starfaði einnig sem sérfræðingur hjá Landsbankanum og í utanríkisráðuneytinu, þar á meðal hjá fastanefnd Íslands hjá NATO í Brussel. Lára Björg skrifaði bókina Takk útrásarvíkingar og er pistlahöfundur hjá Kjarnanum. Lára Björg er með BA gráðu í sagnfræði frá Háskóla Íslands.
Silja Hauksdóttir hefur starfað við skriftir, leikstjórn og kvikmyndaframleiðslu í tvo áratugi. Meðal kvikmynda og sjónvarpsþátta sem Silja hefur leikstýrt eru Dís, Ástríður, Ríkið, Stelpurnar og tvö Áramótaskaup Sjónvarpsins. Silja skrifaði skáldsöguna Dís sem gefin var út af Forlaginu og handrit samnefndrar kvikmyndar í félagi við Birnu Önnu Björnsdóttur og Oddnýju Sturludóttur.
Silja hefur komið að framleiðsluþætti tuga erlendra og innlendra kvikmynda, sjónvarpsþátta og auglýsinga, meðal þeirra eru Batman Begins, Die Another Day, Noah, Thor 2, The Secret Life of Walter Mitty og Interstellar. Silja er með BA gráðu í heimspeki frá Háskóla Íslands og lauk diplómanámi í kvikmyndagerð frá FAMU í Prag og námi í handritaþróun frá Binger Filmlab í Amsterdam.
The post Birna Anna, Lára Björg og Silja stofna nýtt kynningarfyrirtæki appeared first on Fréttatíminn.