Ásgeir Ingvarsson og Youssef giftu sig í Dómkirkjunni fyrir fjórum árum en Youssef hefur ekki enn fengið íslenskan ríkisborgararétt. Ástæðan er íslensk lög sem gera þá kröfu að erlendur maki Íslendings búi á landinu í þrjú ár að lágmarki til að geta fengið ríkisborgararétt. Ásgeir telur lögin úrelt, breyttir lifnaðarhættir nútímafólks kalli á breytt lög.
„Ég kynntist Youssef í Afríkulandi sem ég vil ekki nefna því það gæti stefnt honum í hættu. Það má segja að þetta hafi verið ást við fyrstu sýn og við giftum okkur tveimur árum síðar í Dómkirkjunni á Íslandi,“ segir Ásgeir Ingvarsson blaðamaður sem er ósáttur við að eiginmaður hans fái ekki íslenskar ríkisborgararétt.
Í hættu í heimalandinu
Til þess að fá ríkisborgararétt þarf Youssef að hafa fasta búsetu á Íslandi samfleytt í þrjú ár frá giftingardegi en frá giftingu hafa Ásgeir og Youseff búið víða um veröld því það hentar þeirra lifnaðarháttum. Ásgeir hefur starfað sem blaðamaður víðsvegar um heiminn og Youssef stundar nú nám í Bandaríkjunum. Að dvelja í heimalandi Youssefs kemur ekki til greina. „Það er stórhættulegt því þar viðgangast miklar ofsóknir í garð samkynhneigðra,“ segir Ásgeir. „Nýlega komumst við svo að því að ættingi Youssefs klagaði því í yfirvöld að hann væri samkynhneigður sem þýðir að honum yrði stungið í fangelsi við fyrsta tækifæri, myndum við heimsækja landið. Ef hann hefði íslenskan ríkisborgararétt væri hann aftur á móti óhultur.“
Neitað um undanþágu
Útlendingar geta fengið ríkisborgarrétt eftir tveimur leiðum; Annars vegar með stjórnvaldsákvörðun, þar sem uppfylla þarf margskonar skilyrði um búsetu, íslenskupróf, og fleira, og hins vegar með ákvörðun Alþingis. Tvisvar á ári tekur Alþingi umsóknir til skoðunar en lítið er vitað um hvaða forsendur þingið hefur til hliðsjónar þegar þessar umsóknir eru metnar. „Að þurfa að senda beiðni til Alþingis tvisvar á ári, upp á von og óvon um að þingmönnunum þyki hann orðinn nógu íslenskur til að verðskulda að fá íslenskt ríkisfang með lögum, finnst mér úreltar reglur á 21. öldinni,“ segir Ásgeir en þeir Youssef hafa hingað til fengið synjun um undanþágu frá lögunum frá Alþingi.
Margir í sömu stöðu
„Þetta er fyrst og fremst öryggismál fyrir okkur. Fyrir utan það að Youssef getur ekki heimsótt ættingja sína þá erum við hræddir um hvað yrði um hann ef ég til dæmis félli frá, þá væri hann algjörlega réttlaus. Ég tala nú ekki um ef við ættum börn. Frakkland, Belgía, Holland, Ítalía og Portúgal gera ekki þessa sömu búsetukröfu. Þar fær erlendi makinn ríkisborgararéttinn þegar hjónabandið hefur varað í tiltekinn árafjölda, þó parið búi utan landsteinanna. Fólk lifir öðruvísi lífi í dag en áður,“ segir Ásgeir sem stýrir hópnum Íslendingar í útlöndum – hagsmunsamtök sem fór nýlega í loftið og er nú með ríflega 2.000 meðlimi á Facebook. „Það búa tugir þúsunda Íslendinga erlendis og stór hluti þeirra er í sömu stöðu og við, þessu verður að breyta.“
The post Ósáttur við að eiginmaðurinn fái ekki ríkisborgararétt appeared first on Fréttatíminn.